Stórhóll

Flutt!!

2007-07-27T18:25:00.000Z

Nú er ég komin hingað og vonandi líkar mér þar, því mér leiðast flutningar alveg óskaplega ;o)
Sjáumst (eða þannig..) vonandi á hinni síðunni..

Stóðið rekið á heiðina

2007-07-24T12:39:00.000Z

Garðar og Svenni marka einbeittir á svip.

Hryssurnar voru reknar á heiðina í gær, öll folöldin mörkuð og hófarnir klipptir á því sem þurfti. Afföllin í hrossunum hérna ætla engan endi að taka, eitt folald var horfið og hvergi sást tangur né tetur af því. Annað folald er ekkert nema skinn og bein, við gáfum því ormalyf og pensilín og ætlum að fylgjast með því hvernig það plumar sig. Þetta er alveg ótrúlegt hvað við erum búin að vera óheppin síðastliðið ár :/

Hryssurnar lagðar af stað á heiðina.

Þegar búið var að sortera okkar hross voru þau rekin af stað upp í Valdarásrétt þar sem þau biðu þar til búið var að ná í hrossin hans Svenna. Þetta gekk allt saman alveg ljómandi vel, krakkarnir héngu á hverri þúfu og tróðu sig út af krækiberjum, sem mér fundust vera ansi safalaus og smá. Krökkunum fannst þau hins vegar alveg æðisleg! Verður greinilega gott berjaár í ár, hver þúfan af annarri var svört af berjum.

Svo fallegt bros ;o)

Svo voru folöldin hans Svenna mörkuð í réttinni, ef þið eruð að leita ykkur að litahrossum þá er Svenni rétti maðurinn! Varla hægt að finna einlitt folald í hópnum hjá honum og mörg býsna sperrt að sjá.

Eitt af fjölmörgum litaflottum folöldunum hans Svenna.

Jarpskjótta hryssan hennar Valgerðar er ekki lengur jarpskjótt, núna er hún orðin brúnskjótt en verður væntanlega gráskjótt ;o) Ég er hætt að reyna að litagreina þessi blessuðu folöld mín, ef ég ákveð einhvern lit á þau taka þau bara upp á því að skipta algjörlega um lit!

Svo sjáið þið í rassinn á hryssunni sem ég var að vonast til að yrði litförótt, það er bara ekki hægt að sjá það ennþá því það er ekkert byrjað að missa fæðingarhárin. Sá eitt litförótt hjá Svenna og það var mjög líkt þessu á litinn, kannski ekki eins ljóst og þetta. Það væri nú gaman að eignast eitt litförótt, þó það sé nú ekki minn uppáhaldslitur. Ég get þó sagt þá að ég hafi átt einu sinni svoleiðis ;o)

Enda þetta á mynd af Valgerði sem varð 7. mánaða í gær og mátti dúsa með mér í bílnum á eftir hrossunum mest allan daginn og var svo stillt og góð....eins og venjulega ;o)

Heyskapur og tiltekt

2007-07-22T17:57:00.000Z

Heyskapur stendur sem hæst núna á Stórhóli, búið að slá allt hérna heima við og Hrísar verða slegnir á þriðjudaginn. Garðar er að rúlla núna í þurrrúllur og pabbi gamli rakar. Og ég sit við tölvuna?! Ég ætti nú bara að skammast mín! Reyndar er ég búin að gera ýmislegt í dag sem gefur mér alveg fullan rétt til að setjast niður og skrifa nokkrar línur ;o)

Pabbi er búinn að vera hérna hjá okkur þessa vikuna að hjálpa til, smíða hænsna- og kanínubúr og svona sitt lítið af hverju- allt hlutir sem við komum aldrei í verk! Og síðast ekki en ekki síst er hann duglegur að tína upp hin ýmsu verkfæri sem vissir aðilar henda frá sér þar sem þeir standa...nefni engin nöfn. Alveg nauðsynlegt að fá svona fólk í heimsókn öðru hvoru til að laga slugsaganginn hérna :o)

Ég er alltaf að hugsa um að færa þessa síðu mína eitthvað annað, td. á 123.is eða bloggar.is eða eitthvað annað. Leiðist alveg óskaplega að setja myndir inn á einhverja síðu eins flickr.com, ég vil hafa þetta allt á sömu síðunni. Þið megið þess vegna alveg kommenta með það hver af þessum síðum er þægilegust við að eiga, mér líst svolítið vel á uppsetninguna hjá 123.is svona af því sem ég hef skoðað.

Á morgun rekum við merarnar á heiðina með Svenna á Hrísum, þá verður væntanlega heilmikið fjör þar sem það þarf að marka um 45 folöld. Ég er búin að setja batteríin í hleðslu....sem er jú ávísun á að ég gleymi að taka þau með á morgun! Skelli samt vonandi inn einhverjum skemmtilegum myndum eftir að við erum búin á morgun.

Enda þetta á mynd af Léttfeta sem er 3.vetra, hann er orðinn svo fallegur finnst mér og ekki skemmir nú liturinn. Hefði samt mátt vera aðeins gulari á skrokkinn, því þá sæi maður betur blesuna á honum.

Gott í þetta skiptið, farin að líta á hvernig heyskapurinn gengur!

I´m back

2007-07-15T13:47:00.000Z

Búin að vera tölvulaus í að mér finnst heila eilífð.

Ég hafði það loksins af að koma tölvunni í viðgerð, það var búið að standa til í marga mánuði en ég hafði nú alltaf hummað það af mér. Það kom þá náttúrulega að því blessuð tölvan hætti algjörlega að hlýða mér, ég vissi alveg upp á mig skömmina með það og sendi hana því loks af stað til höfuðborgarinnar. Nú er bara að vona að hún hætti að láta eins og asni við mig, hún hefur nefnilega verið að kveikja og slökkva á sér í tíma og ótíma, ansi pirrandi þegar maður hefur ekki vit á að seifa það sem maður er að gera :/

Annars er allt tíðindalítið, heyskapurinn ekki enn byrjaður á Stórhóli en ég býst við að við byrjum á Hrísum í næstu viku. Við ætlum að reyna að taka heima-heyið í þurrrúllur, við höfum bara ekkert að gera með allt þetta hey. En vafalaust verður ágúst mánuðurinn blautur, þó ekki nema bara af því að við ætlum að heyja í þurrrúllur! Það er allt hreinlega að skrælna hérna, kemur ekki dropi úr lofti og rigningin virðist ekkert vera á leiðinni á næstunni.

Tryppin komust á heiðina eftir heilmikinn eltingarleik, og eitt er víst; við stríðum ekki Svenna meira á óþekku hrossunum hans ;o)

Kýrnar 2 og kvígan litla fengu loksins að fara út fyrir um viku síðan, að sjálfsögðu gekk það ekki áfallalaust fyrir sig frekar en annað hér á bæ. Kvígan hljóp upp á þjóðveg af því að hún missti af kúnum þegar þær hentust um í rassaköstum, það var okkur til happs að kvígan er svo skelfilega feit að hún var sprungin eftir nokkurra metra hlaup! Þannig að Garðar og Svenni gátu fylgt henni aftur inn í hólfið án nokkurra vandræða. Þær eru í sama hólfi og eineistungarnir okkar, þið hefðuð átt að sjá upplitið á þeim þegar beljurnar komu æðandi til þeirra með rassinn upp í loft!! Aldrei sést sperrtari skepnur á Stórhóli held ég ;o) Við erum viss um að annað hvort er eistað sem komið var niður með öllu horfið, eða þá að hitt hafi skoppað niður í öllum hamaganginum!

Enda þetta á mynd af Garðari og Amadeus, en Garðar reið með bræðrum sínum og fleirum hingað heim frá Blönduósi. Garðar var orðinn svo rasssár að hann var farinn að standa í hnakknum síðasta spölinn ;o)

Og ég sat inni í bíl og hló...

Ég var búin að skrifa

2007-06-21T11:54:00.000Z

alveg heljarinnar pistil hérna í gær, sem svo hvarf eins og dögg fyrir sólu. Og í dag er ég alveg andlaus og man ekkert hvað það var sem var svona óskaplega gáfulegt og merkilegt sem ég pikkaði inn. Sem bendir til þess að það hafi ekki verið mjög bitastætt og því get ég varla grátið það að hann hafi ekki skilað sér á síðuna.

Ekkert merkilegt í fréttum, Garðar háþrýstiþvær timbur alla daga og ég planta sumarblómum í alla mögulega og ómögulega blómapotta. Og svo koma hundarnir og kettirnir í kjölfarið og naga blómin mér til ómældrar ánægju...eða þannig.

Eitt af því skemmtilegra sem ég geri er að kaupa sumarblóm. Það er til svo mikið af fallegum blómum og ótrúlegt en satt, geta sum þeirra lifað allt sumarið hérna hjá mér -þeas. ef þau fá frið fyrir hinum ýmsu dýrum sem búa hér. Sem betur fer var Garðar ekki með í för þegar ég fór og verslaði blómin, honum hefði blöskrað eyðslan í kerlingunni og sett mig í sumarblómakaupstraff...svona fyrst að ég er laus úr Bónusstraffinu ;o)

Ég var búin að fylla í alla mjólkurbrúsa sem til voru af blómum, þannig að ég ákvað að færa mig upp aðeins upp á skaftið og fór að spyrja Garðar hvort hann ætti ekki eins og eitt myndarlegt traktorsdekk fyrir mig til að planta blómum í.

Þið sem þekkið Garðar vitið að hann er nefnilega ansi duglegur í að sprengja dekkin á traktorunum.

Það eina sem hann gat hins vegar boðið mér var lúið dekk undan skítadreifara. Uhhhh....nei takk. Ég held að ég reyni þá bara að finna eitthvað annað, nóg er til af draslinu hérna og það hlýtur að vera hægt að troða blómum í eitthvað af því!

Jæja, nú er víst best að hætta, Kolbrún var að koma inn með bólgið og blóðugt nef; Garðar sem er þessi týpíski karlmaður (kvenfólk veit hvað ég á við), sveiflaði einni spýtunni beint framan í Kolbrúnu, "sem átti ekki að standa þar sem hún stóð, allavega var hún ekki þarna rétt áðan!"

Bið að heilsa í bili..

Húsbóndinn á heimilinu

2007-06-18T10:05:00.000Z

á afmæli í dag. 31. árs gamall, set inn mynd af honum í tilefni dagsins. Svo sjáið þið líka á myndinni eina af aðferðum hans til að endurrækta- rífa bara þúfurnar með sér þegar hann rúntar um á fjórhjólinu! Alltaf að spara sér tíma þessi elska ;o)

Það hafðist af

2007-06-14T17:56:00.001Z

Folald undan Alvari og Skessu

að koma stóðhestinum á sinn stað, með hvorki meira né minna en 29 hryssur! Dágóður slatti myndi ég segja! Ég hafði það líka af að taka heilar 120 myndir í tilefni dagsins, ég hendi inn myndum af folöldum á myndasíðuna eins hratt og mín góða nettenging leyfir.

Þetta gekk allt býsna vel með góðri hjálp frá Nonna, Víði og Svenna, að sjálfsögðu máttum við elta hrossin hingað og þangað en það fylgir nú bara svona brasi. Allt fór á réttan stað á endanum og þá er nú í lagi þó karlarnir þurfi aðeins að hlaupa spikið af sér ;o)

Varmi kominn á veginn.

4.vetra voru tekin inn, Varmi og Sandra. Varmi henti sér nú strax á hliðið á réttinni og hljóp því út um allt og endaði með reiðhestunum inni í gerðinu. Meira fiðrildið sem ég á! Það verður eitthvað fjörið að temja hann skal ég segja ykkur!

Svo voru eineistungarnir að sjálfsögðu teknir inn líka. Nú er bara að fara að klípa í til að athuga hvort nú finnist tvær kúlur í stað einnar..

Ég reyndi sem mest ég mátti að kyngreina öll folöld, en eftir að ég var búin að kíkja undir stertinn á einum 7 stykkjum mátti ég játa mig sigraða. Það er víst betra að hafa blað og skriffæri þegar maður stendur í svoleiðis löguðu, allavega er það ekki fyrir minn litla heila að muna.

Skundi fékk far heim eftir öll hlaupin..

Hitinn var eiginlega of mikill fyrir greyið hrossin. Folöldin voru rennsveitt og héngu á spenanum nærri stanslaust. Þess á milli dormuðu þau við hliðina á mömmu sinni, alveg ógurlega þreytt! Folaldið undan Gránu hennar Kolbrúnar var nú bara við það að falla um koll af þreytu!

Það þyngdist heldur á mér brúnin þegar á leið, því nú var víst komið að því að taka hana Von mína úr ásamt tveimur öðrum sem fara undir aðra hesta. Já, það er víst komið að leiðarlokum, alltaf erfitt að láta frá sér hross sem hafa fylgt manni síðan maður var smákrakki. Það var ekki langt í að tárin læddust niður kinnarnar þegar hún var teymd úr hópnum og kökkurinn í hálsinum stækkaði með hverri mínútunni sem leið. Það er bara vonandi að sú veturgamla sem ég á undan henni verði jafnmikil kempa og sú gamla, þá verð ég glöð með mitt!
Læt þetta duga,annars endar þetta með því að ég set inn allar 120 myndirnar sem ég tók!

Gargandi snilld!

2007-06-09T12:17:00.000Z

Hér sjáið þið nýjasta folaldið sem fæddist í gær, varð bara að sýna ykkur það!

Best að sýna ykkur mynd af því frá öllum hliðum, ég er ekki viss um að allir séu hrifnir af hinni hliðinni á þessum litla stubb! Við erum hins vegar hæst ánægð með hann...

Og að framan séð..

Svo langar mig til að spyrja ykkur hvaða litur þetta er:

Það er undan moldóttri meri og jörpum hesti, er þetta ekki bara följarpt eða bleikjarpt einhvernveginn?? Mér fannst eins og augun í því væru mun ljósari en venjulega?

Erum að fara að stússast í hrossum í dag og vonandi á morgun, losa okkur við hagagönguhross og græja hryssurnar sem eiga að fara með Mjölni í hólf.

Folaldið sem ég bjástraðist við í 5 daga drapst að lokum, það fékk aldrei almennilegan þrótt í afturpartinn og gat aldrei staðið upp af sjálfsdáðum. Ekki alveg eins og það átti að vera. Aldrei verið eins mikið bras á hrossunum eins og eftir að við urðum fjárlaus!

Vonandi næ ég að taka myndir af öllum folöldunum, mig langar til að koma myndum af þeim öllum á myndasíðuna mína, það eru bara 3 hryssur sem eiga eftir að kasta sýndist mér. Og vonandi verður veðrið svona frábært á morgun eins og það er í dag, það er svo gaman að labba innan um hrossin í svona veðri og taka myndir af þeim.

Þetta er gott í bili, hef ekkert að segja -langaði bara að sýna ykkur folaldið!

Best að hugsa sinn gang

2007-06-07T16:07:00.000Z

Ætli þetta endi svona hjá mér einhvern daginn? Nógu dugleg er ég að sanka að mér öllum anskotanum, Garðari til ómældrar gleði....eða þannig! Að vísu get ég alveg lofað að ég ætla alls,alls ekki að fá mér rottur, það er nóg að hafa einn dverghamstur á heimilinu held ég ;o)

Mjölnir

2007-06-05T13:32:00.000Z

Ég hef ekki haft neinn tíma í að fara að skoða folöldin þar sem við erum að reyna að basla við að halda lífi í einu folaldi sem virðist alveg ómögulega geta fattað að fara á spena. Það er svo máttlaust og virðist ekki hafa neina krafta til að sjúga merina. Þannig að ég er að reyna að mjólka merina og blanda einhverju mjólkursulli saman handa því til að reyna að fá einhvern kraft í það. Er ekki ýkja bjartsýn á framhaldið satt best að segja...

En þar sem ég var búin að lofa að setja inn myndir af Mjölni er víst best að standa við það ;o)

Klárinn er virkilega fallegur og mjög prúður í umgengni, við settum hann bara beint í merar þegar hann kom, þar sem plássið í hesthúsinu er orðið af skornum skammti út af veika folaldinu. Enda engin ástæða til að láta þetta hanga inni að ástæðulausu. Folinn var líka guðslifandi feginn að komast út á lífið ;o)

Jæja, hef engan tíma í þetta, farin að hræra saman mjólk, eggjum og hunangi og kveð í bili..

Loksins

2007-06-02T16:09:00.001Z

Eftir heilmikla lægð í folöldafæðingum rættist heldur betur úr því í dag og gær. Hvorki meira né minna en 7 folöld sem komu í þessari bunu. Hef ekki enn náð að skoða þau eða taka myndir af þeim, skelli mér í það eins fljótt og ég get og um leið og styttir upp hérna. Það er búið að rigna alveg svakalega mikið svona inn á milli í dag, sem er frábært því það var allt orðið hálf skrælnað hérna og úthagi ekkert farinn að taka við sér að ráði. Og hitinn sem betur fer á uppleið, hann var að verða ansi þreytandi þessi endalausi kuldi. Vænti þess að góður kippur komi í þetta núna og stóðhesturinn komist því í merarnar eftir næstu helgi.

Talandi um stóðhesta; klárinn sem við verðum með í sumar var byggingardæmdur í vikunni á Gaddstaðaflötum og fékk þennan líka fína dóm. 8,44 fyrir byggingu takk fyrir! Svo skemmir nú ekki liturinn, en hann er bleikskjóttur. Ég sé fram á erfitt næsta ár í folalda ásetningi ;o)
Þessi hestur heitir Mjölnir frá Héraðsdal og er undan Hilmi frá Sauðárkróki. Hann á að koma til okkar á mánudaginn, að sjálfsögðu læt ég Garðar prófa gripinn og sjá hvort hann er eitthvað meira en útlitið blessaður. Og ég verð á vísum stað-með myndavélina á lofti..

Ætla að segja þetta gott í bili, set engar myndir í þessari færslu þar sem ég býst við að hafa ríflegt magn af þeim í þeirri næstu. Vafalaust einhverjir sem eru jafn illa tengdir og ég sem blóta þessum endalausu myndum sem ég treð hér inn! Eða er ég orðin sú eina sem bý með ISDN+, sem átti að vera svo MIKLU BETRI en sú tenging sem ég hafði. Hef nú ekki fundið það nema á einn hátt; mun hærri símreikningi...

Eitt enn, þið eruð nú meiri dónarnir að minnast ekkert á breytt útlit síðunnar, kostaði blóð, svita og tár að breyta þessu (ok...smá ýkjur :)! Hnusssssss....!

Það skiptast á skin og skúrir

2007-05-28T13:17:00.000Z

og þá á ég bæði við í veðrinu hérna sem og lífinu sjálfu. Ný folöld hafa fæðst en því miður dó eitt þeirra, brúnhöttóttur hestur. Við vitum nú ekki af hverju það dó, við höldum að það hafi bara króknað því það fæddist þegar það var slyddudrulla hérna og kalt. Svo þurfti merargreyið endilega að kasta út í mýri þannig að það hefur verið erfitt fyrir folaldið að komast á lappir til að ná í ylvolgann sopann hjá mömmu sinni.

Það var svo reynt að venja annað folald undir merina, en það folald var fætt mánuði fyrir tímann og lifði því miður ekki heldur. Alveg ótrúlegt hvað merin var góð, þetta er hross sem hefur aldrei verið snert, annað skipti sem hún er sett í kerru á ævinni og hún var eins og ljós allan tímann! Við gátum meira að segja mjólkað hana eins og við vildum- hún stóð eins og stytta. Enda tók hún strax við nýja folaldinu en því miður fór sem fór. Það vantar ekki brasið í búskapinn :o/

Krissi gaf líka upp öndina um helgina. Við bjuggumst nú alveg við því, hann var bara ekki eins og hann átti að vera. Eitthvað klikk í meltingunni held ég, AB mjólkin var semsagt gagnslaus í þessu tilfelli..

Leikskólinn og skólinn að verða búinn, mikið er ég fegin því það er orðið ómögulegt að koma krökkunum í rúmið á skikkanlegum tíma. Og í kjölfarið alveg hundleiðinlegt að koma þeim á lappir á morgnana.

Húfa kastaði um helgina, kom með jarpskjótt- kynið veit ég ekkert um því þær mæðgur Húfa og Jarpskjóna voru vægast sagt ljónstyggar og leyfðu mér ekkert að koma nálægt.

Náði einni mynd af því á harðahlaupum á eftir Húfu, það er fallega rauðjarpskjótt sem ég er mjög ánægð með, því Jarpskjóna kom nefnilega með dökkjarpskjótt.

Ég fór með Valgerði í skoðun í vikunni, sem betur fer segi ég því hún var komin með mikla eyrnabólgu. Annars var hún ekkert búin að vera neitt voðalega óróleg, tók svona ágætis tarnir (5 mínútur eða svo :o) og svo bara allt í lagi. Hún fékk sýklalyf hjá lækninum og núna er hún alveg pollróleg eins og henni einni er lagið. Ég hef aldrei þekkt nokkurt barn sem hefur verið svona svakalega rólegt, svei mér þá, ég hélt ekki að svona börn væru til!

Garðar plægir eins og vitlaus væri, það verður nóg að gera í steinatínslunni í sumar! Hann er byrjaður að plægja löngu túnin niður frá og eins og annars staðar hérna er svona einn og einn steinn sem lætur sjá sig ;o) Það er um að gera að gera þetta á meðan við erum fjárlaus svo þetta fái einhvern frið til að verða almennilegt.

Jæja, læt þetta duga í þetta skiptið, nóg komið í bili ;o)

23.5.2007

2007-05-23T12:34:00.000Z

Það er tvennt sem þið lesendur eigið að taka eftir á þessari mynd.

Í fyrsta lagi er það hestakerran, sem var í heilmikilli yfirhalningu hjá Ása í Holti. Sérstaklega eigið þið að dásama hvað hún er fallega máluð af Garðari, hann er mjög stoltur að hafa haft þetta loksins af!

Í öðru lagi er það að sjálfsögðu hrossið á myndinni. Hver haldið þið nú að þetta sé?

Já, þetta er Vaka- hin eina sanna. Hún er semsagt öll að braggast eins og þið sjáið, við höfum haft hana úti á túni á daginn og svo er hún farin að taka upp á því að vera ekkert nema óþekktin þegar hún á að fara inn ;o) Garðar og Ragnar Logi eltu hana uppi á fjórhjólinu, þeim leiddist það nú ekki! Þannig að nú vona ég að þetta sé allt að koma hjá ólánshrossinu mínu...7-9-13!

Og já, enn eitt folaldið komið; jarpskjótt hryssa sem að við erum að hugsa um að gefa Valgerði Emmu. Er það ekki kjörið að gefa henni það í 5 mánaða afmælisgjöf? ;o)

Enda þetta á mynd af prinsessunni sem er semsagt 5 mánaða í dag..

Snjór og folöld

2007-05-22T09:50:00.000Z

Þegar ég fór á fætur rúmlega 7 í morgun var allt hvítt. Um hálf 9 var allur snjórinn sem betur fer farinn, það er huggun að hann er allavega fljótur að hverfa aftur!

Tvö ný folöld komin; Skessa kom með móbrúnan hest í gær, ég veit ekki hvað er málið með þessa liti á folöldunum. Þar sem ég hef átt mjög fá grá hross veit ég ekkert hvernig þau geta verið á litinn þegar þau fæðast. Getur móbrúnt orðið grátt? Spyr sá sem ekki veit..

Kvika var svo nýköstuð þegar ég kíkti upp eftir í morgun, það er svartur hestur- sem verður væntanlega grár þá. Hún valdi sér nú ekki besta staðinn, greyið folaldið lá úti í mýri og skalf úr kulda. Ég stuggaði við því og Kvika hljóp á braut með folaldið á eftir sér.

Annars verð ég að fá að monta mig af því hvað merarnar eru vel fóðraðar hjá Garðari. Já, maður verður nú að reyna að finna eitthvað til að monta sig útaf, það er ekki mikið til skiptana í þeim efnum ;o) Það er enginn munur á þeim fyrir eða eftir köstun. Enda hefur svo sem ekki verið sparað í þau þar sem allt snýst um að koma heyjunum út hið snarasta.

Skessa td. sem er hérna á mynd fyrir neðan hefur oft verið frekar erfið í holdum á vorin, hún er yfirleitt svo stygg og erfið þegar hún er með folaldi. Núna gæti hún allt eins átt eftir að kasta einu folaldi í viðbót ;o) Mig grunar nú að við eigum eftir að fá þetta góða atlæti í hausinn þegar við fáum fé aftur, þá verða þau að sætta sig við að fá ekki eins ríflega gjöf og núna og vafalaust verður fýlusvipur á einhverju þeirra þá! Sjaldan launar kálfurinn ofeldið eins og ég hef sagt áður...

Númer 3

2007-05-20T18:02:00.000Z

Ósköp eru þetta vesæl bloggskrif hjá mér, ekkert gerist nema að ný folöld komi í heiminn. Hálf skammarlegt að sitja við tölvuna og blogga einhverja bölvaða vitleysu þegar flestir aðrir sem við þekkjum eru á kafi í sauðburði þessa dagana! Já Hallfríður; ég skil alveg ósköp vel hvernig þér líður, við skulum bara vona og trúa að við getum tekið þetta með trompi þegar að því kemur og við fáum tækifæri til ;o)

En áfram með Glæstar Stórhóls-Vonir ;o) - hún Jörp mín frá Stórhóli kastaði í nótt. En að sjálfsögðu gat það ekki gengið snuðrulaust fyrir sig; hún Þota þurfti að taka upp á því að stela folaldinu! Bölvuð p..... er geld þetta árið og það var ekki að spyrja að því að hún ákvað að næla sér í eitt folald í sárabætur. Þota er þessi brúna á myndinni en það er þessi dökkjarpa sem á það. Folaldið saug og saug Þotu en auðvitað var sá dropi ansi þunnur.

Það var kominn óttalegur kengur í hestinn litla og ekki var það nú til að bæta útlit þess, þar sem það er bæði lítið og ósköp ljótt (þó svo að folöld séu nú alltaf ósköp sæt). Við náðum að taka Þotu frá folaldinu og það endaði með að við máttum taka hana inn því hún var jú kolvitlaus yfir því að missa folaldið sitt!

Nú, þeir sem kannast við hana Jörp frá Stórhóli, vita að hún er ekki beint lamb að leika sér við. Hún æðir áfram eins og hraðskreið lest og ekkert má verða á vegi hennar. Hún vildi folaldið en vildi það samt ekki, og ekki er hlaupið að því að halda henni á meðan folaldið sýgur. Þannig að hún var látin dúsa í allan dag með folaldið hjá sér í réttinni og sem betur fer fór þetta allt á hinn besta veg. Folaldið fékk loksins að sjúga hana og Jörp losnaði líka við hildarnar sem við vorum farin að vera áhyggjufull um að færu ekki af sjálfsdáðum. Guð hjálpi mér ef við hefðum þurft að fá dýralækni til að taka hildarnar úr henni!

Liturinn á folaldinu....hmmm...best að segja minnst um hann, Hallfríður rekur hann ofan í mig öfugan og því best að láta ykkur dæma litinn sjálf. Reyndar finnst mér persónulega folaldið vera bara brúnt en samt kannski dökkjarpt, sem verður svo kannski grátt ;o)

Ég sé ekki fram á það að geta gefið henni Vöku minni nýtt nafn eins og staðan er í dag. Hún er bara alls, alls ekki eins og hún á að vera. Ingunn er búin að skoða hana aftur og getur ekki bent á neitt sérstakt sem hrjáir hana, nema það að henni líður illa alls staðar. Sem er alls ekki gott svar. Við erum búin að vera með hana á sýklalyfjum, bólgueyðandi og verkjastillandi nærri því samfleytt síðan slysið gerðist en því miður þrífst hún ekki nógu vel. Við tókum upp á því í dag að gefa henni AB mjólk, en við erum búin að vera að gefa Krissa AB mjólk að ráði pabba og ákváðum að gefa henni bara líka fyrst við værum að þessu AB sulli. Hún getur allavega ekki orðið verri greyið, ég ætla nú ekki að gefa hana upp á bátinn strax. Það væri náttúrulega bara best að koma henni út á græn grös, en það er bara svo skelfilega kalt alla daga og hún hímir bara í kuldanum. Garðar hefur haft hana í smá hólfi á daginn til að leyfa henni að bíta, en eins og ég segi vantar að pota hitastiginu aðeins meira upp hérna...heyrirðu það Hallfríður!

Best að enda þetta á mynd af grislingunum þremur fyrir mömmu, þar sem ég veit að hún hefur afskaplega takmarkaðan áhuga á hrossum og einhverju þeim tengdu..

Annað folald

2007-05-17T13:57:00.000Z

Eitt folald kom í heiminn í nótt, jörp hryssa undan Kolbrúnu frá Stórhóli og Alvari. Ég bjóst nú ekki við að það kæmi jarpt undan brúnni meri og gráum hesti (fæddur brúnn)? Hann er að vísu undan jarpri hryssu og Kolbrún gæti verið það líka, hef ekkert gáð að því í Feng. Enda skiptir það nú engu máli, huggulegt folald hvernig svosem liturinn er á því ;o)

Labbitúr

2007-05-16T14:37:00.000Z

Við Valgerður Emma og Skundi fórum í gönguferð í blíðunni, ég skellti henni í svona barnapoka og þrammaði með hana á maganum hingað og þangað. Við byrjuðum á að kíkja á hrossin en það voru engin ný folöld mætt á svæðið. Folaldið hennar Dömu var að skoða sig um í réttinni, því leist afskaplega vel á tökubásinn. Er ekki eins viss um að það verði svona vinsæll staður seinna meir ;o)

Við tókum myndir af öndum og hænum líka, reyndar áttum við fótum okkar fjör að launa þar sem haninn var ískyggilega æstur í að elta okkur. Hann hljóp á eftir okkur eins og vitlaus væri en ég reddaði málunum með því að kalla á Skunda, honum finnst sem betur fer alveg ÆÐISLEGT að fá að elta hanann ;o)

Þegar heim var komið sátu Tarzan og Bangsi á þvottavélinni og biðu eftir matnum sínum. Pírðu augun í sólinni en fylgdu mér samt eftir með höfðinu til að gá hvort ég færi nú ekki að hella mat í dallinn þeirra. Minntu mig hálfpartinn á Stevie Wonder, vantaði bara að þeir dilluðu sér meira .

"Hvar er maturinn okkar kerling??!"

Annars gengur lífið sinn vanagang. Kosninga- og Júró helgin var ágæt, fyrir utan að ríkisstjórnin féll ekki. Ætla ekkert að fara að rökræða um það, ég hef ekki nógu mikið vit á pólitík til þess. Og eins og ég hef áður sagt vil ég hafa rétt fyrir mér í alla staði og því er best að láta þetta umræðuefni kyrrt liggja. Því það þykjast jú allir hafa rétt fyrir sér í þessum efnum, er það ekki?

Nú er úti veður vont

2007-05-12T12:50:00.000Z

og að sjálfsögðu fæðist þá fyrsta folaldið í ár! Og eins og undanfarin ár er það hryssan hans Gísla, Dama frá Brekku, sem ríður á vaðið. Folaldið er bika svart og hryssa sýndist mér, verður því væntanlega grátt. Faðirinn er Alvar frá Nýja-Bæ, sem er grár foli fæddur 2003. Hann er undan Huginn frá Haga og Furðu frá Nýja-Bæ. Ég legg til að hún verði nefnd Kosning, það er öllu skárra en Júróvísa eða eitthvað álíka ;o) En ef þetta er hestur, tja...allavega verður það þá ekki nefnt Össur!

Eins og þið sjáið er veðrið ekki til að hrópa húrra fyrir, kengur í litla greyinu. Það er samt vel sprækt og Dama passar sig á að vera í skjólinu við réttina. Að vísu rauk hún af stað þegar ég mætti á svæðið, alltaf stygg þegar hún er nýköstuð. Þannig að ég var fljót að láta mig hverfa eftir að hafa náð nokkrum misgóðum myndum, reyni að ná betri myndum seinna þegar veðrið er aðeins betra..

Ég og Garðar vorum einmitt að tala um það hvenær fyrsta folaldið kæmi í morgun, ég sagðist halda að það ætti nú að fara að koma. Hann vildi meina að það kæmi í fyrsta lagi folald upp úr 20. maí, en eins og venjulega veit ég best ;o)

Ég hef greinilega allt annan smekk

2007-05-11T13:52:00.000Z

á tónlist en aðrir Evrópubúar. Ókei.... sök sér að Eiríkur komst ekki áfram. En þvílík leiðindalög voru þetta sem komust í úrslitin! Serbía var með nokkuð gott lag og eitthvað eitt lag enn (sem ég man samt ekki hvaðan er) en þar með er það upptalið. Alveg hreint arfaslök lög að mínu mati. Fullt af fínum lögum sátu svo eftir í súpunni með Eika. Nenni varla að horfa á aðalkeppnina á morgun, er svo fúl yfir þessu.

Kosningarnar eru á morgun, ég er enn að reyna að ákveða hvar ég á að setja krossinn minn. Búin að útiloka 3 flokka; Samfylkinguna sem vill helst drepa alla bændur, Íslandsflokkurinn (eða hvað hann heitir) getur ekki talað um neitt annað en stóriðjustopp og Framsókn....já....er bara Framsókn -útskýri það ekkert nánar. Ég get vonandi gert upp hug minn í kvöld þegar leiðtogaumræðurnar verða í Kastljósinu, en ég er eins og fjöður í vindi í sambandi við þetta. En mikið verð ég glöð þegar "Kæri vinur" og "Ágæti bóndi" pósturinn hættir að berast hingað!

Það er napurt um að litast hér í dag. Gengur á með éljum af og til, ekkert orðið hvítt þó. Bara þetta týpíska sauðburðarveður býst ég við.

Hafið það gott um helgina og kjósið nú rétt (segir sá sem ekkert veit í sinn eigin haus!)
;o)

Fjölgun á Stórhóli

2007-05-10T17:45:00.000Z

Nei, það eru ekki komin folöld. En það eru hins vegar komnar 3 litlar og sætar kanínur hingað ;o) Já, já, þið þurfið ekkert að segja mér að ég sé rugluð, ég veit allt um það. Búin að fá allnokkur andköf og hneykslunarsvip frá fólki, but who cares?

Tvær þeirra eru voða kammó en sú þriðja er svolítið feimin ennþá. Þetta eiga að vera 3 herramenn og vonandi er það rétt, svo maður fari nú ekki að fá óvænta glaðninga einhvern daginn ;o)

Annars er ekkert að frétta, er að fara að gera mig klára í júróvision gláp- er ekkert voðalega bjartsýn á að við komumst áfram...en það er aldrei að vita. Svo fer sem fer eða eitthvað álíka. Eiríkur er náttúrulega langflottastur, ég veit bara ekki alveg hvort aðrir Evrópubúar viti það?

Ég er á lífi

2007-05-08T13:16:00.000Z

Já, það hafðist af að halda afmælið hans Ragnars Loga með pompi og pragt. Allur bekkurinn hans mætti og meira til og þetta gekk svona líka ljómandi vel. Og gaman að spjalla við krakkana, greinilega þónokkrir spekingar í bekknum ;o) Ég gleymdi náttúrulega myndavélinni heima í öllum æsingnum, ekki í fyrsta og öruggulega ekki síðasta skipti sem ég gleymi henni.

Gubbupestin hefur verið að hrjá okkur hérna á hólnum. Fyrst fékk ég hana, Kolbrún á miðvikudaginn seinasta og svo Garðar, Ragnar og Janine á föstudagskvöldið. Ég er búin að þvo ískyggilega marga umganga af rúmfötum,koddum,sængum, teppum og böngsum, fyrir utan gólf og sófa sem hafa líka fengið að kenna á því. Kolbrún heldur meira að segja áfram að gubba, er búin að gubba einu sinni á hverju kvöldi núna í 3 daga. Hún vill greinilega halda mér í æfingu í rúmþvottum, ég get ekki sagt að ég sé neitt sérstaklega ánægð. Garðar er líka þeim eiginleika gæddur að hann bara lokar augunum þegar einhver gubbar og svo þegar hann opnar þau aftur-Abrakadabra!! ælan er horfin! -eins gott að hann lendi ekki í því að vera einn heima með börnin þegar svona gerist ;o)

Garðar fór með veturgömlu folana á Blönduós í geldingu í gær. Og hvað haldiði? Auðvitað var ekki hægt að gelda nema einn þeirra, þrír þeirra eru eineistungar. Lykill (sem hét Trítill), Móskjóni og Mósi hennar Sóleyjar komu því heim aftur með kúluna á sínum stað. Ég held að það sé bara verið að segja okkur að hafa þá graða, einhver að reyna að hafa vit fyrir okkur þarna uppi ;o) Hver veit? Garðari fannst þetta hins vegar ekkert sniðugt...týpískur karlmaður!

Ég er farin að bíða spennt eftir fyrstu folöldunum, sem koma líklega um miðjan mánuðinn. Reyndar eru tvær geldar, kannski þrjár, sem okkur finnst leiðinlega mikið. Yfirleitt aldrei verið nema mesta lagi ein á ári sem hefur verið geld. Plús það að ein er líka búin að láta. Alltaf sami skaðinn á Stórhól, það er ekki að spyrja að því :o/

Við erum rétt byrjuð að háþrýstiþvo í fjárhúsunum, þetta potast allt saman. Erum að vona að við getum klárað mestu inniþrifin núna í maí, þá er malarkeyrslan og allt það eftir. Svo þarf að plægja niður skítinn úr húsunum, það er eitt og annað sem þarf að gera þessa dagana.

Kálfurinn Krissi tórir enn. Þó ekki meira en það, þar sem hann drekkur ósköp takmarkað finnst okkur. Virðist ómögulega fatta að sjúga, ég held að hann sé pínu þroskaheftur greyið. Það er búið að reyna alls konar hundakúnstir á hann en ekkert virkar. Þannig að ef þið lumið á góðu ráði þá megið þið alveg láta mig vita ;o)

Ég er búin að hleypa fiðurfénaðinum mínum út í veðurblíðuna. Endurnar rúnta um alla jörðina eins og venjulega, ég vona bara að þær fari nú ekki á upp á veg eins og þær gerðu í fyrra, ekki viss um að það hafi allir vegfarendur mikla þolinmæði að bíða eftir að þær drattist áfram eftir þjóðvegi 1. Ég er ekkert allt of dugleg að loka þær af, mér finnst svo gaman að leyfa þeim að vappa um (plús það að ég er allt of löt til að nenna því) en það er öllu verra að tína upp eggin þeirra hist og her. Þetta eru hamingjusamar og frjálsar hænur og endur sem búa hér sjáiði til ;o)

Styttist í afmæli

2007-05-03T13:51:00.000Z

Ragnar Logi á afmæli á sunnudaginn. Litla barnið mitt að verða 7. ára! Það verður heljarinnar partý í félagsmiðstöðinni á mánudaginn. Það þarf allt að vera eftir kúnstarinnar reglum, diskarnir verða að vera svona, glösin svona, boðskortin svona, maturinn svona, svona mætti lengi telja. Það var nú bara skítur á priki að halda giftingarveisluna forðum miðað við þetta! Gráu hárunum hefur fjölgað allverulega síðustu daga skal ég segja ykkur...

Fór í Bónusferð með Olgu í gær. Ég er sem sagt ekki í BónusíBorgarnesimeðOlgu-straffi lengur. Þið munið kannski eftir köttunum sem ég kom heim með seinast þegar ég fór með Olgu í verslunarferð? Garðar er ekki búinn að gleyma því , þó hann sé nú búinn að fyrirgefa mér það svona innst inni;o)

Ég var ósköp stillt í þessari ferð, kom bara heim með heilmikið af drasli fyrir afmælisveisluna og sælgæti handa Garðari. Hefðum ekki getað komið einu brauði í bílinn í viðbót, hann var svo smekkfullur af vörum.

Talandi um verslunarferðir; ég fór í kaupfélagið mánudaginn fyrir 1.maí og viti menn- það var ekki til nýmjólk í búðinni?! Frídagur daginn eftir og engin mjólk. Ég hef aldrei rekið verslun, en kommon- það hlýtur að vera hægt að eiga helstu nauðsynjar fyrir fólk?? Held að ég fari bara að keyra á Blönduós einu sinni í viku, nenni ekki svona bulli aftur og aftur. Þetta er nefnilega ekki í fyrsta skipti sem þetta gerist. Já, ég get pirrað mig á ýmsu þessa dagana ;o)

Og þar sem pirringurinn í mér er í hámarki þessa dagana ætla ég ekki að hafa þetta lengra. Það gæti endað með því að ég skrifaði einhverja óskaplega vitleysu og kæmi mér í vandræði í kjölfarið. Sem myndi auka enn frekar áðurnefndan pirring. Læt heyra í mér eftir afmælið...ef ég verð á lífi eftir það þeas!

???

2007-04-27T10:27:00.000Z

Mig langar ekkert sérstaklega til að láta ykkur sjá þessa síðu, en ég bara verð. Á nú gjörsamlega að ganga af blessaðri sauðkindinni dauðri?! Þarf flokkurinn að draga hana með sér í svaðið??

"Ungt framsóknarfólk notar kindina í sitt efni og er ekki feimið við uppruna flokksins. Það er töff að vera sveitó og íslenska sauðkindin er mögnuð!" Ég er semsagt töff. Og sveitó. Takk fyrir að láta mig vita.

Ég er nú ekki sérstaklega pólitísk í mér þó ég vissulega hafi mínar skoðanir, sem geta breyst frá degi til dags. En mikið ætla ég að vona að enginn sem ég þekki ýkja náið ætli sér að kjósa þetta. Reyndar væri best ef enginn kysi þessa apaketti, en það er kannski fullmikil bjartsýni í mér.
Og hananú.

Myndasíða

2007-04-25T16:30:00.000Z

Ég er búin að setja nokkrar myndir inn á myndasíðuna mína, ég verð kannski ekkert voðalega dugleg við að setja inn, þar sem það tekur óratíma að hlaða þeim inn. Verk fyrir mjög þolinmótt fólk.......nú, já eða þá sem hafa almennilega nettengingu!

4. mánaða í dag

2007-04-23T11:00:00.000Z

Set hérna inn myndir af Valgerði Emmu í tilefni dagsins. Myndin sem sýnir vel vaxtarlagið er sérstaklega sett inn fyrir mömmu, hún getur ekki hætt að dásama allar þessar fínu fellingar!

Mér finnst hún yndisleg hvort sem hún er í fötum eður ei ;o)

Eitt og annað

2007-04-22T15:00:00.000Z

Við fórum á sýninguna Tekið til kostanna í gærkvöldi. Verð að segja að ég var fyrir vonbrigðum með sýninguna í heild sinni, engin almennileg stemmning náðist upp og ekkert hross sem virkilega greip mig. Dívurnar voru flottar sem og Kraftur frá Bringu og Punktur frá Varmalæk; Geisla frá Sælukoti misstum við af, þar sem að Valgerður var orðin brjáluð hjá mömmu og við urðum að láta okkur hverfa. Asninn ég hafði ekki einu sinni prófað að gefa henni pela áður, og ég var sannfærð um að það yrði lítið mál þar sem hin börnin tóku við honum eins og skot. En það var öðru nær, hún vildi ekki sjá þetta peladót ;o)

Kannski var það bara stemmningsleysið sem gerði hrossin ekkert merkileg, ótrúlegt hvað góð stemmning skiptir miklu máli á svona sýningum! Það var fullt af fínum hrossum...en ekkert þeirra fékk mig til að segja VÁÁÁÁ!! En ég er greinilega alveg dottin út úr þessu, því það

hrósa allir sýningunni í hástert og öllum finnst að stemmningin í höllinni hafi verið frábær! Mikið hlýt ég að vera kröfuhörð ;o)

Ég reyndi með minni flass-lausu myndavél að taka einhverjar nothæfar myndir, en þær urðu af skornum skammti. Tók ótal myndir af Dívunum en það var svo mikil ferð á kellunum að það var andskotanum ómögulegt að ná góðri mynd af hópnum!

En út í aðra sálma. Hún Vaka virðist ætla að vera í lagi....allavega er hún lifandi enn ;o) Hvort hún verður til gagns ætla ég ekkert að segja um, það verður bara að koma í ljós. Ætlaði að taka mynd af henni, en enn og aftur var flassleysið að angra mig. Tók bara mynd af Krissa í staðinn, ósköp lítill en sykursætur. Svona eins og Jógvan, er það ekki Hallfríður?

Myndin af honum er ekkert sérstaklega góð, já helvítis flassið enn og aftur!

Fyrst ég var komin af stað með myndavélina, fór ég og tók myndir af folöldunum og stóðinu öllu.
Að vísu eru myndirnar varla hæfar á netið vegna þess hve drullan er ógurlega mikil en þið verðið bara að reyna að horfa framhjá því ;o) Alveg skelfilegt hvað allt veðst upp þar sem hrossunum er gefið.

Þessi brúna er hryssa undan Hrapp frá Sauðárkróki. Hún er frekar ófríð greyið, en afskaplega skemmtilegur gangur í henni.

Þessi bleikstjörnótta er undan Vita frá Miðsitju. Ég þarf endilega að reyna að ná henni af Garðari, það er eitthvað við hana sem mér líkar alveg óskaplega vel við.

Þessi móskjótti er undan Hrappi líka, fyrsta folaldið sem Garðar setur á sjálfur undan Húfu síðan við komum hingað, höfum alltaf selt folöldin undan henni. Reyndar gáfum við pabba eitt undan henni, ágætis reiðhestur sá klár.

Þessi bleikálótti risi hér til hliðar var seldur í réttunum í haust, en kaupandinn virðist hafa gleymt því og þess vegna ætlum við bara að eiga hann sjálf. Mér sýnist að hann ætti að geta borið mann og annan eftir einhver ár miðað við stærðina á honum núna.

Set ekki fleiri myndir inn í þessari lotu, bæti kannski við fleirum þegar umhverfið verður orðið skárra en á þessum myndum!

Ólíklegustu hlutir geta gerst...á Stórhól!

2007-04-20T17:17:00.000Z

Það er best að byrja á að óska ykkur gleðilegs sumars og segja takk fyrir veturinn :o)
Sumarið byrjar reyndar ekkert sérstaklega vel hérna á bænum.

Á einhvern óskiljanlegan hátt hafði henni Vöku minni tekist að losa sig af básnum sínum í hesthúsinu, labba allan fóðurganginn (sem var reyndar lokaður með keðju), opna hurðina inn í hlöðu og komast þar inn. Þegar Janine fór að gefa í morgun þá stóð Vaka í heyinu inni í hlöðu og þegar hún sá stelpuna ákvað hún að skella sér inn á einn garðann í fjárhúsunum. Þar sem að búið er að moka út úr húsunum er ansi djúpt niður í krærnar og Garðar reyndi því að láta hana bakka allan garðann til baka. Honum tókst að láta hana bakka alveg að hurðinni á hlöðunni en þá vildi ekki betur til en að hún stökk yfir garðabandið og ofan í krónna. Og þar sem lánið leikur nú alltaf við mig og mín hross að þá tókst henni að lenda á heykvísl og stakkst hún í magann á henni! Enginn skilur hvernig í ósköpunum heykvíslin var komin ofan í krónna og hvað þá með kvíslina upp í loft?! Við höllumst helst að því að heykvíslin hafi staðið í hurðargættinni og dottið svona niður þegar hún hljóp inn á garðann.

Uppi varð fótur og fit og ég hringdi í dauðans ofboði í Ingunni dýralækni sem var mætt á mettíma. Og ótrúlegt en satt (miðað við mína heppni í það minnsta!), að þá var hægt að sauma saman gatið eftir kvíslina, en hún hefur samt líklega gert gat á annað lungað í sér þar sem hún andar ekki eðlilega. Þannig að nú er bara að bíða og sjá, við vitum svo sem ekkert hvernig þetta fer ennþá, en við erum í það minnsta nokkuð bjartsýn eins og er. Og ef hún tórir blessunin ætla ég að endurskíra hana; og ætli nafnið Ófeig verði ekki fyrir valinu, því ég er búin að missa 3 önnur hross undan Von (sem þessi er semsagt undan) og mér finnst það miklu meira en nóg.

Reyndar sagði ég við Garðar í fyrradag að ég ætlaði að endurskíra hana þar sem að nafnið Vaka passar bara alveg ómögulega við hana. Sé alltaf fyrir mér að það sé skeiðhross sem ber þetta nafn, Vaka/Ófeig mín er svo skelfilega klárgeng að hún ætlar alveg að drepa Garðar þegar hann fer á hana ;o) Hún hefur kannski frétt þetta og ákveðið að hjálpa mér í nafnavalinu, þar sem ég var alveg strand á því hvað hún ætti eiginlega að heita!

Annars er allt bærilegt í fréttum, það er allt búið að vera á rúi og stúi hérna innanhúss, en við vorum að breyta stofunni. Alltaf verið að brasa einhvern fjandann!

Gleymdi alveg að segja ykkur frá kálfinum hans Garðars; honum Krissa ;o)
Kristófer í Finnmörk hringdi í Garðar á föstudaginn langa og sagði honum að ef hann kæmi strax mætti hann eiga kálf sem að ein holdakýrin vildi ekki. Garðar tjúnaðist að sjálfsögðu alveg upp og brunaði upp eftir og náði í kálfinn. Það gekk hálf brösulega að koma mjólkinni í hann fyrst þar sem hann hafði lítið sem ekkert drukkið í 3 daga eftir að hann fæddist, en hann er allur að koma til núna. Og Garðar alveg hæstánægður með gripinn, sannfærður um að hann hafi bjargað geðheilsu hans þennan sauðburðinn...

Á morgun er stefnan sett á Hvammstanga til að byrja með, en hún Kristin Birna er að fermast á morgun. Svo verður vonandi brunað á Krókinn á eftir, þar sem við ætlum okkur að komast á Tekið til kostanna. Að vísu er veðurspáin ekki til að hrópa húrra fyrir, en vonandi er ekkert að marka hana í þetta skiptið ;o)
Set inn myndir af bágbornum búskapnum okkar og kannski af sýningunni þegar tími gefst til ;o)

Hvað erum við að kvarta undan drullu?!

2007-04-15T15:27:00.000Z

Svona lítur þetta út í dag hjá mömmu og pabba, húsið þeirra er hvíta húsið til vinstri á myndinni.
Þau búa (sem betur fer) á efri hæðinni.

Hérna er svo mynd sem pabbi sendi mér í dag:

Þarna sjáum við vatnsstrauminn niður tröppurnar hjá þeim, ekki mjög kræsilegt!
Það var lán í óláni að mamma var í heimsókn hjá okkur um helgina, þannig að bíllinn hennar slapp í það minnsta. Hún brunaði hins vegar heim áðan þar sem hún vildi að sjálfsögðu ekki missa af öllu fjörinu! Henni hreint elskar svona vesen ;o) Tók Kolbrúnu með sér, henni leiðist nú ekki að komast í smá drullu! Ég ætla allavega ekki að kvarta meira undan drullunni hérna úti hjá mér, sem er ekkert í líkingu við þetta!

Afmælisgjöfin

2007-04-02T17:28:00.000Z

Já, "afmælisgjöfin mín" frá Garðari kom í gærkvöldi:

Á ég að þora út hérna?!

Þetta er semsagt hann Trítill minn. Ég keypti hann nú reyndar sjálf og sá alfarið um allt sem því fylgdi , en svo að Garðari líði nú betur kallast hann semsagt afmælisgjöfin mín. Það verður að réttlæta vitleysuna í mér á einn eða annan hátt ;o)

Víðir náði í hann fyrir okkur þar sem hann þurfti að fara suður með Lindu í flug, þetta var ansi langt ferðalag og ég er ekki frá því að það hefði verið mun ódýrara að senda hann með flutningabíl hingað. Við vitum það allavega fyrir næsta hross sem við kaupum ;o)

Víðir kom ekki fyrr en um 10 leytið í gærkvöldi , þannig að við gáfum honum hey í kerruna og létum hann svo út í morgun - vildum ekki vera að henda honum út í myrkrið í gær. Hann var nú hálf eitthvað sljór greyið, og kannski alveg skiljanlegt eftir allt þetta ferðalag.

Flottastur ;o)

Ég "fékk hann í afmælisgjöf" út á litinn, hann er jarpblesóttur, leistóttur og hringeygður; með þessi líka fallegu bláu augu. Eða mér finnst það fallegt...ekki viss um að allir séu sammála mér með það! Svo er hann bara ansi huggulegur undir sjálfum sér skal ég segja ykkur, veður áfram á skrefmiklu brokki en mér sýnist hann nú ekki vera ganglaus þrátt fyrir það. Kemur betur í ljós seinna!

Nú er ég bara að reyna að sannfæra eiginmann minn um að fá að hafa "afmælisgjöfina" graða áfram, þó ekki væri nema 1-2 ár. Garðar er, vægt til orða tekið, ekki mjög spenntur fyrir því að hafa graðhest í okkar eigu. Þetta er nú meiri þvermóðskan alltaf.

Þannig að nú er um að gera fyrir ALLA að segja Garðari hversu óskaplega sniðugt það væri að hafa hann graðan -þó ekki nema fyrir litinn. Þá endar með því að hann stingur upp á því sjálfur og þykist vera ógurlega sniðugur. Látið mig vita það, ég þekki hann ;o)

Kastljós

2007-03-27T21:57:00.000Z

Ég var að horfa á Kastljósið í kvöld, þar var verið að fylgja fíkniefnalögreglunni eftir í blessaðri Reykjarvíkinni og fylgst var með þegar þeir voru að bösta dópistana. Svo var farið á einhvern skemmtistað þar sem allir voru víst meira eða minna útúrdópaðir og einn lögreglumaðurinn sagði eitthvað á þessa leið: "Þegar ég lít yfir hópinn, þá get ég pikkað út alla sem eru á e-trippi. Það er eins og þessir aðilar æpi á mig." Ekki myndi ég þekkja úr manneskju sem væri búin að fá sér e pillu, ekki einu sinni þótt ég fengi mjög skýran og ítarlegan leiðarvísi um e pillu einkenni!
En þetta var skrýtið.
Þetta er nefnilega alveg eins og mér leið þegar við fundum riðuveiku kindurnar. Það var eins og þær æptu á mig úr 550 kinda hjörðinni.
Held að ég eigi alltaf eftir að geta pikkað út svona kindur líkt og löggan gat þefað uppi e liðið, vona bara að ég þurfi ekki að gera það aftur. Og það er ég viss um að þeir yrðu líka guðslifandi fegnir ef þeir þyrftu ekki lengur að pikka út e pillu notendur. Það er bara vonandi að ósk mín rætist, bæði fyrir mig og þá ;o)

Tíminn líður

2007-03-26T23:09:00.000Z

Set inn mynd af Valgerði Emmu, hún er orðin 3. mánaða! Mikið líður þetta hratt!
Hún var að reyna að segja mér eitthvað rosalega merkilegt þegar ég tók myndina, allavega iðaði hún eins og fló á skinni þegar ég smellti af.
Ég er búin að MARGREYNA að taka mynd af systkinunum öllum saman til að geta nú montað mig af fallegu grislingunum mínum ....en það er ekki svo auðvelt. Ragnar þarf annaðhvort að vera að góna eitthvað út í loftið eða reka út úr sér tunguna og geifla sig ógurlega, en Kolbrúnu finnst það alveg rosalega fyndið að skella rassinum fyrir myndavélina og þykjast prumpa. Vel upp alin börn ha? Skil ekki hvar þau læra þetta...

Ferðin

2007-03-22T18:37:00.000Z

Við fórum í gær til höfuðborgarinnar til að láta taka nefkirtlana úr Kolbrúnu. Það tók ansi fljótt af, hún var kannski í korter inni hjá lækninum og svo var bara beðið eftir að hún vaknaði eftir aðgerðina. Hálfgerð færibandavinna fannst mér, hún var ekki fyrr vöknuð en það var byrjað að ýta okkur nær og nær útgönguleiðinni. Fengum ælubakka í hönd og svo vorum við kvödd með det samme. Ekki það að mér finnist sérstaklega gaman að hanga inni á svona stöðum, en fyrr má nú aldeilis fyrr vera!
Við ákváðum að taka enga sénsa og vorum eina nótt fyrir sunnan, bæði þar sem við vildum ekki vera að flækjast með Kolbrúnu svona hálfslappa og líka af því að veðrið var svo andskoti leiðinlegt. Ekkert spennandi að vera fastur upp á heiði með tvö börn. Þannig að Fríða var svo elskuleg að redda okkur gistingu á vægu verði á Fjörukránni (eða hótelinu þar...ekki á barnum sjálfum!) -ekki slæmt skal ég segja ykkur. Alltaf gaman að gista á hóteli svona eins og eina nótt, það gerist nú ekki svo oft. Verst að við vorum orðin svo þreytt að við vorum sofnuð kl. 22:30 eða um það bil!

Svo var bara brunað af stað í morgun, með stoppi í Bónus í Borgarnesi, þurftum að vísu að hanga þar í klukkutíma þar sem búðin opnaði ekki fyrr en kl. 12:00. Við rúntuðum bara um bílasölurnar þangað til hún opnaði og skoðuðum alveg óheyrilega mikið magn af ryðguðum vögnum og vörubílum. Garðari fannst þeir alveg rosalega flottir og fínir, ég var ekki eins hrifin satt best að segja..

Annars er lítið að frétta, ég hafði það af að verða þrítug á sunnudaginn var, finn nú ekki mikinn mun á mér enn sem komið er. Fékk leiðindaveður í afmælisgjöf, ég er reyndar alvön því. Get talið þau á fingrum annarrar handar góðu afmælisveðrin sem ég hef fengið um ævina. 'Eg held svei mér þá að marsmánuður sé leiðinlegasti mánuður ársins!

Læt þetta duga, ætla að fara að gefa mannskapnum að borða og horfa á veðurspánna, það er víst önnur lægð á leiðinni í heimsókn...

Ó Reykjavík

2007-03-13T20:33:00.000Z

Fórum suður í gær með Kolbrúnu til HNE læknisins. Vorum mætt á settum tíma (að ég hélt?!), eða stundvíslega kl. 11:40. En nei.....þá áttum við víst að mæta klukkan 9:45! Ég var nú ekki par sátt, veit að ég hefði aldrei tekið tíma svona snemma morguns þar sem að við ætluðum að keyra suður um morguninn. Mér finnst 11:40 EKKI hljóma neitt líkt 9:45....finnst ykkur það?!
Anyway, hún komst að klukkan 13:00 í staðinn og það kom í ljós að hún er með of stóra nefkirtla eins og við vissum og einnig með vökva í báðum eyrum. Þannig að við verðum að fara aftur suður í næstu viku, en það verður stungið í eyrun og nefkirtlarnir teknir. Og ég hafði vit á að fá tímann skrifaðan niður af lækninum sjálfum á blað! Þetta lið fær ekki að plata mig aftur!

Kíktum í Hestagallerý, Garðar verslaði sér úlpu og eitthvað dótarí, ég keypti mér einn taum, veit ekki alveg til hvers þar sem ég er steinhætt að fara á bak. Hundarnir geta þá fengið eitthvað til að naga í það minnsta, þeir hafa verið iðnir við það síðastliðin ár allavega...
Hittum meira að segja mann í búðinni sem var gangnamaður fyrir Stórhól í gamla daga, gaman að því :o)
Kíktum svo aðeins á Stebba bróður í Húsasmiðjunni, hann var ekki búinn að sjá Valgerði þannig að það var kominn tími á það.
Varð ekkert meira um búðarráp þar sem tíminn var uppurinn, fer alltaf drjúgur tími hjá okkur í að koma okkur á milli staða í þessari blessuðu höfuðborg.
Þegar heim var komið var Ragnar Logi orðinn lasinn aftur. Kominn með 39,6°C og hundslappur. Janine var orðin veik líka þegar við vorum fyrir sunnan og ég er alltaf með helvítis ógleði inn á milli. Ég held að þessar pestir ætli sér bara ekkert að fara aftur. Óþolandi!

En, semsagt, það verður lagt í aðra Reykjarvíkurferð í næstu viku. Illu er best aflokið ;o)

P.S Fór semsagt ekki á mótið á Svínavatni vegna heilsuleysis, missti greinilega af miklu..

Það hlaut að koma að því

2007-03-09T09:56:00.000Z

Já, veturinn er víst kominn, enda ekki seinna vænna ef hann ætlar að koma á annað borð ;o)
Búið að hrúga niður snjó í alla nótt, manni líður hálfpartinn eins og Ástrala að sjá snjó í fyrsta sinn! Mér finnst þetta nú öllu skárra og hreinlega en auð jörð, og þar sem mér leiðast skúringar óskaplega er þetta vel þegin ofankoma...

Valgerður er komin með alveg hreint ógeðslegan hósta. Ég vona að doksi geti gefið mér einhverja töfralausn á þessu, ég þoli hreinlega ekki þegar svona lítil börn veikjast. Hún er samt spræk og hitalaus eins og er í það minnsta, það er bara hóstinn sem er svona slæmur.
Ætla að reyna að komast á danssýninguna í skólanum í dag, hlakka mikið til að sjá Ragnar Loga tjútta á dansgólfinu ;o)

Ég var að skoða skráningarnar á mótið á Svínavatni, það eru víst komnar 170 skráningar! Vá! Væri rosalega gaman að fara að horfa, sé til hvernig veðrið verður á morgun og hvernig dömurnar mínar verða í veikindunum. Orðið mjööööööööööög langt síðan ég hef farið á mót, svo langt síðan að ég man ekki hvaða mót það var. Greinilegt að fertugsaldurinn er að bresta á eftir nokkra daga, hvernig verð ég þá þegar ég skríð í fimmtugsaldurinn?!

Annars er eitt og annað í bígerð hér í kotinu, sem ég mun að sjálfsögðu tilkynna mínum dyggu lesendum (þessum heilu 3) um leið og ég get. Segi ekki meir í bili, þar sem að ég veit í raun ekki alveg hvernig þetta fer eða hvort af þessu verði. Mjög skiljanlegt hjá mér eða þannig er það ekki? Við Garðar höfum of mikinn tíma til að spá og spekúlera þessa dagana, þetta getur ekki endað öðruvísi en með ósköpum held ég!

Bloggedí blogg

2007-03-06T14:31:00.000Z

Svo skelfilega langt síðan ég hef bloggað eitthvað, þannig að ég ákvað að skella inn nokkrum línum- þó svo að ég hafi í raun ekki frá neinu að segja.

Það er búið að rífa út allt heila klabbið í fjárhúsunum, bara eftir að taka garðana út úr nýju húsunum. Rífandi gangur í þessu semsagt ;o) Bjössi á Sporði er byrjaður að grafa út úr þeim, þar sem að stefnt er að því að setja allt á grindur og fínerí. Er það nú ekki skemmtilegra fyrst að þessi fjandi þurfti að koma upp hérna? Við getum eiginlega ekki hugsað okkur að hafa nýju kindurnar á taði, nú erum við orðin svo fanatísk og sjáum skrattann í hverju horni!

Talandi um nýjar kindur; það var viðtal í Ísland í dag í seinustu viku við bónda sem fékk nýtt fé síðastliðið haust. Mikið öfundaði ég hann! Ég er viss um að þegar að því kemur að við megum fá nýjar kindur, verð ég orðin svo upptjúnuð af æsingi og stressi að ég mun vafalaust falla í yfirlið þegar féð mun renna í hlað. Við erum farin að planleggja ferðir nú í haust til að skoða líflambafé...þó svo að við fáum ekki fé fyrr en haustið 2008! Um að gera að skoða það sem í boði er og rabba við bændurna, það skiptir nefnilega líka máli hvernig þeir eru. Ég vil ekkert vera að kaupa fé af einhverjum rembings körlum sem sjá ekkert nema naflann á sjálfum sér! Stefnan er sett á 400 lömb +hrúta á fyrsta árinu, vonandi sem mest hyrnt ;o) Það er þetta með handföngin sjáiði til...svo eru þessar hyrndu bara svo miklu fallegri á svipinn ;o)

Ég held að Ragnar Logi hafi fyrst í seinustu viku fattað fyrir alvöru að féð okkar væri farið. Hann fór í fjárhúsin með Garðari og sá bara ekki neitt í húsunum, hvorki kindur né milligerði eða annað! Nú er æsingurinn svo mikill í honum að þrífa, hann skefur timbrið og rífur nagla eins og vitlaus væri, svo við getum fengið kindur bara helst strax. Hann spurði mig hvort hann mætti velja sér 10 kindur þegar að því kæmi, ég sagði við hann að þá yrði hann nú heldur betur að vera duglegur og hjálpa MIKIÐ til. Þá heyrðist í honum: "Jæja, ég verð þá bara að láta tvær duga..."

Tamingar hafa gengið hægt undanfarið þar sem niðurrifsstarfsemin hefur verið í forgangi. Býst við að það verði haldið áfram í þeim í næstu viku, við erum komin með hringgerði sem ég ætla að reyna að dunda í með hrossin svona þegar veður leyfir fyrir Valgerði.
Fer suður á mánudagsmorguninn með Kolbrúnu, hún er að fara í langþráða skoðun til Háls-nef-og eyrnalæknis. Vonandi verða bara nefkirtlarnir teknir úr henni sem fyrst, þetta er alveg skelfilegt hvernig hún er alla daga. Endalaust kvef og hósti, sem endar iðulega með uppköstum og tilheyrandi.

Auglýsti eftir graðfola í hryssurnar í sumar, er búin að fá slatta af tilboðum. Folar af ýmsum stærðum, gerðum og gæðum...segi ekki meir um það. Er ekki búin að gera upp hug minn ennþá, læt það bíða aðeins lengur og sé til hvort eitthvað meira muni standa til boða. Auglýsti svona í fyrra líka og þá gat ég valið úr 12 folum minnir mig! Mig langar svolítið til að fá einhvern litahest, gaman að fá fjölbreytta liti en ekki bara alltaf brúnt og rautt ;o) Svo er það nú bara þannig að það selst frekar ef það er nógu anskoti fjölskrúðugt á litinn! Að vísu var ég með gráan í fyrra, vonandi fæ ég fallega gráa hryssu í vor, hef alltaf verið veik fyrir svona blágráum hrossum.

Jæja, þetta er nú bara orðinn heljarinnar pistill -um ekki neitt ;o) Læt þetta því gott heita í bili...

2007-02-23T14:37:00.000Z

Hér sjáið þið mynd af stórtamningarmanninum Garðari á henni Eldingu, sem Ragnar Logi á. Ekki seinna vænna að fara að temja hana þar sem hún verður víst 7.vetra í vor. Betra seint en aldrei er það ekki?
Garðar er búinn að vera með 8 af hrossunum á Blönduós þessa viku, öll komin á járn og hann er farinn að ríða öllum (nema einu reyndar) út um hvippinn og hvappinn. Það er svo mikill munur að ríða út með einhverjum öðrum og geta elt á tamningarhrossunum. Þetta eina sem hann er ekki farinn að ríða á úti er hryssan mín undan Kalman, hún er svo leiðinleg í beisli að það er ekki hægt að tjónka neitt við hana. Svo er hún klárgengari en andskotinn og það er víst ekkert gaman að eiga við hana svona úti við. Þannig að henni er bara riðið í hringgerði og unnið með hana þar. Þetta kemur allt saman á endanum vonandi.

Ég er búin að vera með ónót í mér alla þessa viku.
Þá er ég ekki að meina einhverja pest, heldur líður mér eins og eitthvað sé að fara að koma fyrir. Eitthvað vesen. Garðar er líka búinn að vera svona, það er vonandi að þetta sé bara einhver fyrirtíðarspenna í okkur báðum ;o) Skrýtið þegar eitthvað leggst svona á mann og maður veit ekkert út af hverju. Kannski fer að bresta á fyrsta almennilega hríð vetrarins, ég veit ekki!

Jæja, Valgerður farin að góla á mig, læt þetta duga í bili...

Ég er svo aldeilis bit

2007-02-20T09:30:00.000Z

Ég skildi ekkert í því í seinustu viku að Stöð 2 datt út hjá okkur. Það var alveg sama hvað ég fiktaði, aldrei kom helvítið inn aftur. Lét Garðar meira að segja hífa mig í fiskikari upp á strompinn til að reyna að laga það sem að væri. Hékk þar með lífið í lúkunum í um klukkutíma og fiktaði í öllu sem hægt var að fikta í -án árangurs. Búin að kreista og klípa allar loftnetssnúrur innanhúss í von um að finna einhverja bilun- án árangurs.

Fer svo í Víðigerði í gær og ákveð að spyrja þar hvort það sé í lagi með Stöð 2 þar. Þá kemur upp úr krafsinu að við erum að fá Digital Ísland á svæðið og það sé búið að aftengja gamla sendinn! Mamma eða hvað það nú heitir var víst um helgina að dreifa nýju lyklunum á svæðinu en auðvitað var ég ekki heima þennan eina dag sem þeir áttu að hafa komið hér við.
Brunaði því út á Laugarbakka í gær til að fá nýjan lykil og viti menn, ég sé aftur Stöð 2! Og núna er Sirkus og Skjár 1 kominn líka. Og ég sem er nýbúin að fá mér gervihnattadisk og græjur af því að við náðum ekki ma. Skjá einum! Ég verð að segja að mér finnst framkvæmdin á þessu alveg til skammar, það hefði nú alveg verið hægt að senda manni smá snepil um að það ætti að fara að breyta þessu hérna. Hefði sparað mér MIKINN tíma og ÓÞARFA fyrirhöfn.

Þannig að nú erum við líklega með um 130-140 stöðvar til að góna á, þetta er náttúrulega til að gera hvern mann vitlausan. Maður situr fyrir framan sjónvarpið með hrúgu af fjarstýringum og nær yfirleitt ekki að horfa á heilan þátt af neinu því maður er alltaf að gá hvað er á næstu stöð!
Það var nú ekki ætlunin að festast við sjónvarpið þó kindurnar væru farnar sko ;o) Enda reyni ég að stjórna notkuninni eftir fremsta megni, er ansi hörð á fjarstýringunum þessa dagana!
Kannski get ég farið að halda bíó kvöld fyrir sveitungana, boðið þeim í PBR partý meðal annars ;o) Það væri ráð....

Mitt leiðinlegasta verk

2007-02-19T14:40:00.000Z

er að gera eitthvað sem tengist bókhaldi. Fæ nettan hroll þegar ég hugsa til þess að það fer að styttast í skil á skattframtalinu.
Hafði það af að koma öllum nótum og greiðsluseðlum á vísan stað í dag, ætla alltaf að gera þetta jafnóðum en einhvern veginn fer það alltaf svo að ég safna þessu bara í stóran haug sem þarf svo að fara í gegnum þegar kominn er tími á skil á virðisaukaskattinum. Það er semsagt að styttast í skil...
Þið skulið ekki halda að ég hafi komið mér í þetta verk að ástæðulausu !

Fann annars "skemmtilegan" reikning (er eitthvað slíkt til?!) sem ég hafði borgað; fyrir tæmingu á rótþrónni. 7.000 kr. greiddar fyrir þetta verk....og það skemmtilega er að rotþróin stendur ennþá í portinu hjá Húnaþingi vestra. Búin að vera þar líklega í um 2 ár. Það er nú meira hvað þetta lið hjá bænum getur skitið.

Bakaði bollur í gær í tilefni bolludagsins í dag, var hófleg í bakstrinum í ár. Hef stundum gert óheyrilega mikið magn af bollum og í staðinn fengið algjört ógeð á rjóma og glassúr í laaaangan tíma. Allt er víst gott í hófi...

Verð að segja að ég er ánægð með að Eiríkur Hauksson skyldi hreppa sigurinn í Evróvisíon-undankeppninni. Fínt lag, ekkert viss um að það geri neinar rosalegar rósir í keppninni í Finnlandi- en það verður okkur allavega til ekki skammar heldur. Hann er bara svo æðislegur kallinn, ég fer alltaf að hugsa um Lion Bar þegar ég sé hann... Urrandi flottur ;o)

Jæja, styttist í að ég þurfi að ná í Kolbrúnu í leikskólann, best að hætta þessu bulli í bili.

2007-02-15T09:32:00.000Z

Ég ætla mér alltaf að fara að taka þessa bloggsíðu í gegn, setja inn fullt af linkum og flottheitum, en eina sem ég kem mér í er að skipta um útlit á síðunni sjálfri. Gat nú ekki einu sinni munað hvar maður á að setja inn linkana á aðrar síður, þið sem það vitið megið gjarnan benda mér á það! Minnið greinilega farið að svíkja gömlu konuna.

Styttist í þrítugs afmælið mitt, mér finnst ég samt alltaf vera tvítug. Seinasti áratugur liðið ótrúlega hratt enda margt gerst á þessum árum. Reyndar eltist ég andskoti hratt fyrir rúmum mánuði síðan, mest hissa að ég skyldi ekki verða gráhærð meðan á öllu havaríinu stóð. Garðar er orðinn býsna gráhærður, enda er hann að verða 31. árs ;o)

Tamningar ganga bærilega, nú þarf bara að fara að koma gömlu klárunum inn svo það sé hægt að nota þá til að teyma og svona ýmislegt. Ekkert hægt að æða í reiðtúr á þessum tamningar tryppum, verða að hafa helst einhvern til að elta þessi grey. Garðar er farinn að ríða á þeim öllum nema tveimur, hann á einn klikkhausinn og ég á hinn. Jafnræði í þessu sko ;o)
Nonni ætlar svo að koma á morgun vonandi og járna eitthvað.

Annars eru tömdu klárarnir orðnir svo svakalega feitir að ég stórefast um að hægt verði að spenna hnakk á þá. Verðum að fá fíla-gjörð til að geta fest hnakkinn á þá held ég. Það var líklega ekkert sniðugt að láta þá hreinsa hánna á túnunum og afganginn af kálinu og rófunum ;o)

Alltaf svo þreytt!

Valgerður Emma stækkar hratt þessa dagana. Ég tek svo sem ekki mikið eftir því sjálf, fyrr en ég fer að skoða myndir af henni. Hef ekkert sett hana í vagn ennþá þar sem það hefur verið svo kalt upp á síðkastið, get ekki hugsað mér að setja hana út í gaddinn sem hefur verið. Fer nú að styttast í það þó, frostið aðeins á undanhaldi loksins. Verður gott að komast aðeins út aftur, hef gert ósköp lítið af því undanfarið :o)

2007-02-11T12:30:00.000Z

Bræðurnir Varmi og Léttfeti

Set auðvitað bara inn myndir af mínum hestum, þar sem þeir eru að sjálfsögðu langflottastir ;o) Haldið þið ekki að ég verði vígaleg í göngunum eftir nokkur ár þegar ég verð komin á Léttfeta? Lukku Láki my ass....ég verð sko mikið flottari! Var ekki hesturinn hans annars ljósblesóttur?

Hafði það semsagt af að fara og taka myndir af 1/2 af stóðinu, auðvitað var myndavélin batteríslaus eftir nokkrar myndir...

Þarf svo að fara í annan leiðangur næstu daga, þar sem folaldsmerarnar eru sér í hólfi. Er orðin spennt að sjá folöldin, ekki séð þau þannig lagað síðan í október. Garðar er nú búinn að viðurkenna fyrir mér að ég eigi fallegasta folaldið...ég vissi það nú alveg ;o)

090207

2007-02-09T15:03:00.000Z

Frábært veður í dag, glampandi sól og logn. Að vísu fjandanum kaldara; -12°C en æðislegt engu að síður. Náðum í stóðið í dag sem var fyrir sunnan veg og settum það í hólfið hérna norðan við bæinn, erum nefnilega að fá hross í hagagöngu og ætlum að hafa þau ein í stóra hólfinu. Okkar merar eru nefnilega soddan frekjur að það er ekki hægt að bjóða ókunnugum hrossum upp á svoleiðis ;o) Ég ætla að reyna að komast kannski út í dag að taka myndir af hrossunum ef tími gefst til. Hef ekki farið og kíkt á hestana mína í ansi langan tíma, ég ætti nú bara að skammast mín það er svo langt síðan!

Gervihnattadiskurinn minn er kominn á vísan stað á strompinum, núna getum við horft á ágætis slatta af stöðvum -hver annarri vitlausari. Engar klámstöðvar fyrir Gassa, en fuuullt af einhverjum tjatt stöðvum þar sem þú getur hringt í dömurnar og þær fækka fötum fyrir þig og gera ýmsar hundakúnstir. Geti ekki sagt að þetta heilli mig, væri kannski annað ef það væru einhverjar svona stöðvar með flottum karlmönnum í stað þessara kvenna :o)

Kolbrún er komin með kvef eina ferðina enn, ég þarf víst að fara með hana til HNE læknis og láta rífa úr henni nefkirtlana. Hún gengur um alla daga orðið með hor niður að hnjám, ég hef aldrei þolað svona hor-krakka. Viðbjóðslega ógeðslegt alveg hreint. Vonandi kemst ég því með hana fyrr en seinna í aðgerð, orðin hundleið á þessum snýtingum daginn út og inn.

Læt þetta duga í bili, hef ekkert að segja hvort eð er. Aðallega skylduræknin sem rak mig til þess að skrifa.
Adios amigos

Valgerður Emma

2007-02-05T17:18:00.000Z

Já, hérna er mynd af henni Valgerði Emmu á skírnardaginn sinn. Það var skírt í kvöldmessu í Víðidalstungukirkju í gærkvöldi og var bara æðislega fínt. Var svo rólegt og huggulegt einhvern veginn. Að vísu tók Kolbrún smá aríu fyrir söfnuðinn en Didda í Brún reddaði því með Svala :o)

Held að allir séu nokkuð sáttir með nafnavalið, Valgerður er í höfuðið á ömmu Garðars en Emma er nú bara út í bláinn. Við vorum bæði harðákveðin í þessu nafni eftir að við sáum hana, við höfum sem betur fer ekki þurft að rífast í nafnavalinu á börnunum okkar...enn sem komið er í það minnsta. Höfum alltaf verið ótrúlega samtaka með þetta, td. með Kolbrúnu; þetta var fyrsta nafnið sem okkur báðum datt í hug! Andlega skyld-ekki spurning!

Garðar er byrjaður að temja! Já, þetta telst til tíðinda. Að sjálfsögðu eru mínir hestar bestir....en því miður líka verstir. Og sú sem átti að vera verst er nú bara langbest, enn sem komið er allavega. Spennandi að sjá hvernig þetta þróast allt saman. Víðir tók svo einn folann á Blönduós og ætlar að vera með hann í mánuð og tuska hann eitthvað til.
Folinn sem Víðir er með heitir Glymur, það er þessi brúni á myndinni. Hann er gullfallegur......en hörmulega illa markaður eins og kannski sést á myndinni! Förum ekki nánar út í það, mjög viðkvæmt mál hjá Garðari. Þessi rauðblesótti á myndinni er svo Parkersonurinn minn hann Varmi, hann er á fjórða vetur. Dauðlangar til að taka hann inn núna, það er bara ekki pláss fyrir hann eins og er. Kannski ég geti tekið hann á hús ef eitthvað verður sent til tengdó í eilífðartamningu ;o) Varmi er undan minni gömlu og góðu Von, sem er búin að fylgja mér ansi lengi. Henni var ekki haldið í sumar og fylgir henni nú hennar síðasta afkvæmi sem var sem betur fer hryssa. Á því miður bara eina aðra hryssu undan henni og hún verður vonandi tamin núna :o) Læt að lokum fylgja með mynd af gömlu hetjunni, fjúff...ég fer að verða búin með myndakvótann fyrir allt þetta ár!

Life goes on

2007-01-30T14:35:00.001Z

Já, það er kominn tími til að láta vissa hluti ekki draga sig endalaust niður og gefa sjálfum sér spark í rassinn. Fara að gera eitthvað annað en að horfa út í loftið og hugsa.

Hafði það af að hringja í prestinn og panta skírn, settur dagur er sunnudagurinn næsti, ekki alveg ákveðið hvort það verði í messunni í Víðidalstungukirkju eða bara heima. Messan er nefnilega um kvöldið og það er nú ekkert agalega spennandi að vera seint að þessu þegar fólk er að koma að og er kannski með lítil börn líka. Þurfa að vakna í skóla daginn eftir og svona. Veit ekki hvað við gerum, fer og hitti prestinn í vikunni. Ég verð að hryggja þig með því Hallfríður mín að þú færð ekki nöfnu í þetta skiptið, hver veit hvað gerist með næsta ;o)

Ég fjárfesti í gervihnattamóttakara og græjum í vikunni, nú er bara einn höfuðverkur eftir; það er að tengja þetta helvíti. En ég sé fram á bjarta tíma, get flakkað um nokkur hundruð stöðvar þegar herlegheitin verða komin í gagnið og við skötuhjúin horft á uppáhaldssjónvarpsefnið okkar; Pro Bull Riding :o) Reyndar heimtar Garðar að fá bláar stöðvar til að horfa á, segist ekki skilja neitt ef það er ekki textað?! Hann getur nú bara hunskast út og horft á himininn ef hann vill fá eitthvað blátt!

Svo verður maður að horfa á handboltann í kvöld, Danmörk- Ísland, ég vildi nú að við hefðum fengið einhverja aðra til að keppa við í fyrsta leiknum í 8 liða úrslitunum, eru þau tvö lið sem ég held með :o/ Ég er náttúrulega Íslendingur í húð og hár....en ég er samt hálfur Dani þrátt fyrir það ;o)

...

2007-01-25T10:51:00.000Z

Ég er í vondu skapi. Ef þið vonist til að lesa fyndna og skemmtilega færslu þá skulið þið haska ykkur hið snarasta af þessari síðu.

Kindurnar okkar voru sendar í sitt síðasta ferðalag í gær. Þetta var erfitt. Mjög erfitt.
Allt sem maður hefur stritað við seinustu átta árin er bara farið. Ég veit vel að þetta eru "bara" kindur og ég á að vera þakklát fyrir mín heilbrigðu börn og allt það, en það gerir þetta ekkert auðveldara. Ef það er eitthvað sem ég þoli illa, þá er það óréttlæti gagnvart dýrum. Finnst við vera ósanngjörn við allar kindurnar sem ekkert var að.

Þar sem að við erum svo sýkt og hættuleg ,var ekki hægt að fá neina almennilega bíla í þetta verk og fengum við 2 gamla skrjóða sem tóku rétt rúmlega 100 kindur í ferð. Þetta endaði því í 5 ferðum, var byrjað 8 um morguninn og var ekki búið fyrr en um 5 leytið í gær. Sérlega skemmtilegt eða þannig. Ekki viss um að allir myndu sætta sig við þetta..

Þetta er líka búið að taka allt of langan tíma. Nærri 6. vikur erum við búin að bíða og bíða. Ég gæti haldið laaaaaaaaaaangan pistil um heimskar skrifstofublókir fyrir sunnan, en ég ætla að hemja mig í þetta skiptið. Held að þær séu ekki færar um að skilja að fólki getur aktúally þótt vænt um dýrin sín.

Nýtt ár gengið í garð

2007-01-01T16:07:00.000Z

Gleðilegt nýtt ár!!!!!!!!!!!!!!!

Já hér sjáið þið nýasta fjölskyldumeðliminn, sem ákvað að koma í heiminn á þorláksmessu. Hún var fædd 14 merkur og 52 cm. - meira en nóg að mínu mati *hóst*....
Fæðingin gekk annars vel, frekar hægt kannski þar sem hún var í framhöfuðstöðu, en hún skilaði sér út á endanum (ég var nú farin að örvænta á tímabili), mér til mikillar lukku. Þetta er nú meira helvítið að fæða barn, skil ekki hvernig manni dettur í hug að gera þetta aftur og aftur?!
Held að hún sé líkari Ragnari Loga þegar hann var kríli, allavega er hún róleg eins og hann var- sefur allan daginn og er bara alveg til fyrirmyndar enn sem komið er ;o)
Ég eyddi semsagt jólunum á spítalanum, Garðar og krakkarnir voru hjá mor og far á aðfangadagskvöld, svo var Garðar hjá mér um nóttina. Segi ekki að ég vilji eyða mörgum jólum á sjúkrahúsi, en þetta var svosem upplifun að vera þar á þessum tíma.

Annars er allt bærilegt að frétta, þó ekki meira en það. Ýmislegt búið að ganga á hér og stendur þó hæst að búið er að staðfesta riðu í fénu hjá okkur og verður skorið niður núna eftir áramótin. Svakalegt kjaftshögg að fá, þetta eru búnar að vera erfiðar vikur og ég sé svosem ekki fram á bjartari tíma á næstunni. Vildi fegin geta sofið af mér þessi ósköp :o/ Það rættist það sem Garðar var búinn að spá; að um leið og við værum komin yfir 500 fjár og búin að byggja, myndum við fá einhvern svona "glaðning" í hausinn. Ughhhh...

Stefnan er sett á að taka hross inn um næstu helgi, Garðar verður bara að demba sér í tamningarnar- enda svo sem af nógu að taka! Ekki mikið gerst í þeim efnum síðustu árin og eigum við því uppsafnað svona eins og eitt eða tvö hross (+ fleiri) til að hjaksast á í vetur. Það þýðir víst ekkert að gefast upp er það??

Læt þetta duga í bili, best að eyða ekki öllum nýársdeginum fyrir framan tölvuna..
Hafið það gott á nýju ári greyin mín :o)

Jóla jóla!!

2006-12-01T10:48:00.000Z

Búin að setja upp inniseríurnar...vííííí!!! Það er svo gaman að hafa jólaljós. Búin að fjárfesta í nýrri útiseríu, nú er bara að bíða eftir því að rokið hætti, þá verður Gassinn rekinn upp í stiga til að hengja upp ;o)
Annars ekkert að frétta, fjárhúsin klár og búið að taka féð inn. Rúningur hafinn, mamma skilur ekkert í þessu; ef það er ekki verið að moka og keyra skít á þessum bæ er verið að rýja...(eða það finnst henni allavega!).
Stefnan sett á Reykjavíkina um næstu helgi; mamma, ég og krakkarnir förum og bruðlum alveg ógurlega ;o) Svo ætlum við Garðar að reyna að fara bara tvö ein einhvern tímann fyrir jólin. Þeas. ef barnið ákveður ekki að koma í heiminn áður....

2006-11-14T10:16:00.000Z

Ég held uppteknum hætti og skrifa ekki neitt hér inn nema með löööööööööööngu millibili. Ég hef heldur ekkert verið þekkt fyrir (held ég??) að kjafta af mér, best að breyta ekkert út af vananum með það.
Í fréttum er það helst að það er búið að vera skítaveður upp á síðkastið, rok og endalaust rok. Höfum sloppið tiltölulega vel með ofankomuna, sem betur fer. Nýju fjárhúsin líta út eins og það hafi verið varpað sprengju inn í þau, við máttum grafa upp í kringum allar stoðir og gera einhverja aukastyrkingu í kringum þær. Ekki að ég viti nokkurn skapaðan hlut um það, veit bara að það er ömurlegt að standa í þessu! Eigum eftir að steypa í þetta, vonandi hefst það af í vikunni (sem ég hef nú ekki mikla trú á vegna þess hve miklu frosti er spáð) þar sem að við komum náttúrulega engu fé þarna inn eins og staðan er í dag.

Núna er rétt rúmur mánuður þangað til krakkagrislingur númer 3 á að koma í heiminn, get ekki sagt að ég sé búin að koma miklu í verk í tengslum við það. Þarf endilega að fara að skipuleggja eitthvað, í það minnsta hvar/hvernig ég ætla að koma blessuðu barninu fyrir með sitt dót inn í svefnherbergi. Eins og flestir kannski vita er herbergjum ekkert ofaukið hér í þessu húsi.

Við keyptum okkur aðra holdakýr og ber hún það virðulega nafn Karolína. Garðar elskar hana út af lífinu, hann er nefnilega ekki vanur svona skapgóðri skepnu. Hann dásamar hana á hverjum degi og blótar hinni.... okkur hefur nefnilega ekki enn tekist að ná Karamellu og Lakkrís inn þrátt fyrir margar tilraunir. Í hvert skipti sem á að reyna að plata hana inn hleypur kálfskrattinn af stað með halann beint út í loftið og tekur með sér svona eins og eina, tvær girðingar í leiðinni. Og auðvitað æðir þá kusa á eftir honum, þó held ég að hún vilji nú komast inn. Það er sko ekkert grín að vera kúabóndi ;0)

Stóðréttirnar búnar...

2006-10-13T18:29:00.000Z

og það er ekki hægt að segja að heimtur séu góðar. Okkur vantar eitt folald og 3. vetra mertryppi, og eitt folald var ekkert nema skinn og bein og við máttum lóga því þegar heim var komið. Alveg hreint ótrúleg afföll á einum bæ finnst mér nú. Ég var nú að tala um að það þyrfti að fara að fækka í stóðinu, en þetta var nú ekki alveg það sem ég vildi!

Annars gekk helgin vel fyrir sig, Gummi Sveins, Hanni og Hilmar voru hérna og sötruðu ýmsar veigar með húsbóndanum. Bara fínasta helgi....fyrir utan hrossamissinn að sjálfsögðu.
Nenntum ekki á ballið, verður bara tekið betur á því að ári liðnu ;o)

Ómskoðunin kom vel út, Anna Magga var ein við þetta og gekk barasta alveg ljómandi. Bakvöðvinn að mælast talsvert betur en verið hefur svona yfir heildina og lærin að potast upp á við líka. Svo sem ekki sami ráðunautur sem skoðar og í fyrra, en allavega lýgur tækið ekki ;o)
Allt í gúddí semsagt. Svo fer restin af lömbunum í slagteríið á mánudaginn, þannig að það verður smalað fram og til baka alla helgina. Janine skilur ekkert í þessu, alltaf verið að smala sama landið aftur og aftur og aftur....

Kolbrún er byrjuð í leikskólanum í Víðihlíð, er 3 daga í viku sem mér finnst alveg nóg. Gott fyrir hana að komast aðeins að hitta aðra krakka og mannast svolítið. Hún er nefnilega svolítið mikið mömmubarn ;o) Sem mér finnst reyndar bara voðalega notalegt...gott að vera einhvers metinn ekki satt? ;o)

Hallfríður mín, ég tjatta við þig um hrúta og lambaskoðanir á MSN-inu næst þegar ég sé að þú ert "á línunni" ;o)

Tölvur...

2006-09-29T10:14:00.000Z

Tölvan mín hrundi endanlega um daginn, hlaut svosem að koma að því. Held að hún hafi verið árgerð 1996, þannig að það var nú reyndar kominn tími á eitthvað aðeins meira móðins! Blessuð sé minning hennar. Þannig að ég skellti mér á nýja tölvu, alveg rosa flott og rosa stór, hef ekki hugmynd hversu stór reyndar, en Stebbi bróðir sagði allavega að ég hefði EKKERT að gera með svona stóra tölvu. Hvað þykist hann vita hvað ég þarf stóra tölvu...pifffff.....hlusta ekki á svona bull! Reyndar á ég svo eftir að flytja allt úr gömlu tölvunni yfir í þessa þannig að hún er hálf tóm ennþá þessi nýja. Og öll netföngin eru í þessari gömlu þannig að það fær enginn tölvupóst frá mér á næstunni, enda nenni ég yfirleitt ekki að senda neitt. Samt finnst mér ég aldrei hafa þurft að senda eins mikið og núna þegar ég hef ekki netföngin við hendina!! Og að komast ekki í heimabankann er algjör HORROR!! Þvílík leiðindi að þurfa allt í einu að fara í bankann til að borga reikninga!

Við erum að vonast til að fá ómskoðunina fyrir lömbin á mánudaginn, var víst eitthvað bilerí í tækinu og ekki alveg öruggt að það yrði komið í lag. Væri gott að vera búinn að þessu, því það er ekki hægt annars fyrir okkur að fara í þetta fyrr en um miðjan október.
Svo er stefnt á að fara núna á næstunni að ná í hrútana sem við erum að kaupa, fundum loksins ferhyrndan lambhrút en við sóttum um 3 "venjulega" hrúta og einn ferhyrndan. Verður gaman að sjá gripinn, hann er víst svarhöttóttur á litinn.
Jæja, nenni ekki meiru- enda ekki frá neinu merkilegu að segja!

Gangnaslúðrið!!

2006-09-12T21:10:00.000Z

.............................Reyndar hef ég barasta ekkert slúður úr göngunum.
Þeir sem eru alltaf fullir í göngunum voru það víst líka núna og kindunum sem átti að smala var held ég smalað- í það minnsta flestum. Því miður Hallfríður mín; ég get ekki glatt þig með neinu krassandi :o( Það gæti svo sem verið að Garðar hafi verið með einhvern óhemjugang og læti, en þá er ég líklega sú síðasta sem fréttir það!

Við erum búin að slátra um 170 lömbum, kemur ágætlega út enn sem komið er, það er bara vonandi að haustið verði sæmilegt í þetta sinn.

Heyrðu, já....ég skellti mér suður í gær og keypti mér eitt stykki Nissan Micru! Ég og bílar...elska að versla bíla! Þetta er ágætis dós ( þangað til hún bilar), fínt að keyra hana og eyðir engu. Garðar er svo búinn að fá leyfi til að braska með Toyotuna, guð má nú vita hvernig það nú endar. Svo er ég eiginlega búin að lofa að vera til friðs í bílamálum, tja...allavega út þetta ár ;o)

Langt síðan...

2006-09-06T10:47:00.000Z

Já, ég hef ekki nennt að blogga mikið upp á síðkastið. Hrein leti- ekkert annað.
Ýmislegt þó verið gert og ýmislegt gerst:

#Svisslandið heimsótt, bara rosalega gaman en hefðum svosem mátt vera heppnari með veðrið. Skoðuðum ótal fjós, hesthús, fjárhús, nautgripi, kindur, hesta.....þetta var bændaferð semsagt! Mér tókst nú samt alveg að versla eitthvað (allavega sýnir kortareikningurinn það...), föt á mig og krakkana og svona sitt lítið af hverju. Alltaf hægt að versla ;o)

# Barn númer 3 á leiðinni, Garðar hefur svo gaman af því að fikta ;o)
Krílið á að koma í heiminn 22.des - ég er nú ekki par hrifin af þessari dagsetningu! Ég ætla ekki missa af jólasteikinni! Helst vil ég rumpa þessu af tímanlega fyrir jólin, við sjáum hvað setur..

# Ragnar Logi er byrjaður í skóla! Nú er engin miskunn lengur, á fætur kl. 7:00, guttinn borðar morgunmat meðan ég smyr nestið fyrir hann og svo kemur skólabíllinn um 8. Mesti höfuðverkurinn er að koma Ragnari í rúmið á kvöldin, eins og margir vita hefur háttatíminn hér á bæ verið ansi misjafn hjá börnunum og gamlir siðir gleymast seint. Annars er hann mjög ánægður í skólanum og það hefur gengið vel hingað til.

# Skólabíllinn keyrði yfir Skutluna mína. Var mikil sorg hér á bæ, krakkarnir dýrkuðu hana enda var hún einstök. Held samt að ég sakni hennar mest, hún var svo trygg og góð, þó hún gæti gert mann vitlausan þegar hún sá hross! Þeir missa sem eiga.

# Klikkaða kusa fór í sláturhúsið, eftir að henni hafði tekist að drepa Janine Mariu Magdalenu (kálfinn sinn semsagt). Karamella komin út með sinn kálf og búin að ferðast á nágrannabæi. Er þó búin að vera til friðs seinasta mánuðinn. Ég held að hún sé búin að rasa út.

# Stebbi bróðir búinn að gifta sig. Fórum í brúðkaupið að sjálfsögðu, var rosalega flott allt saman.

Náttúrulega skrilljón fleiri hlutir búnir að gerast í sumar, ég bara man ekki meira í augnablikinu. Garðar er í göngum núna og kemur niður á morgun. Svo er réttin á föstudagsmorguninn. Gaman, gaman - ég elska réttir! Alltaf svo gaman að sjá hvernig lömbin eru eftir sumarið, sem er reyndar búið að vera alveg skelfilega leiðinlegt hérna.
Svo á að slátra á mánudaginn, við settum tæp 60 lömb síðastliðinn mánudag og það kom bara ágætlega út.
Læt þetta duga í þetta skiptið, reyni að hafa mig í að blogga eftir helgina þegar ég er búin að fá gangnaslúðrið ;o)

Hæ hó jibbý jei

2006-06-17T22:46:00.000Z

Fór í fermingarveislu í dag, sem var fínt því þá þurfti ég ekki að elda nokkurn skapaðan hlut, sem var ennþá betra þar sem ég var á næturvakt seinustu nótt. Eintóm leti ;o)

Svo á minn ástkæri eiginmaður afmæli eftir um 5 mínútur, verður þrítugur hvorki meira né minna. Ekkert sérstakt sem stendur til á morgun þrátt fyrir það, býst nú við einhverjum gestum þó og verð því að skella mér í baksturinn á morgun.

Annars er ekkert í fréttum, rigning og rok alla daga sem gerir mann ekki sérstakan í skapinu. Ekki enn búið að sá í flögin, ekki enn farið að hleypa á heiðina (nema geldfé í Krók) og ekki enn búið að setja graðhestinn í hryssurnar. Status Quo semsagt. Sauðburður þó loks búinn, endaði á að Garðar mátti keyra upp í Krók til að marka lamb sem einn af geldu gemlingunum hafði borið. Greinilega ekki alveg að marka ómskoðunina á þessum bæ, enda er ekkert hér eins og það á að vera ;o)

Taktu hár úr hala mínum...

2006-06-02T22:36:00.000Z

Tja, reyndar var það aðeins meira en nokkur hár sem fuku af brjáluðu kusu í dag, segjum kannski frekar eins og rúmlega helmingurinn af hárunum á halanum á henni. Það vildi nefnilega svo skemmtilega til að kálfurinn komst ekki á spena (ha já kemur á óvart, ekki satt?!) og því máttum við kalla út mannskap til að hjálpa okkur að vísa Janine Mariu Magdalenu réttu leiðina. Og það er nú bara ekkert grín að eiga við svona skepnur skal ég segja ykkur! Kusa var á endanum kyrfilega njörfuð á bæði fram-,mið- og afturenda og svo var tekið til við að mjólka. Og mikið var litli kálfurinn glaður að komast á spena! Og svei mér þá ef kusu var ekki létt líka, enda voru tútturnar á henni alveg við það að springa eftir sogleysi síðustu tveggja daga! Við verðum svo bara að vona að þetta dugi til að kvígan litla fatti að fara á spena, því kálfurinn fer að verða ansi dýr ef kalla þarf út mannskap þrisvar á dag til að láta hana sjúga ;o)

Hryssan hans pabba kastaði í gær, okkur til mikillar gleði, en hún gat ekki kastað í fyrra og var alveg heilmikið bras að draga úr henni þá. Hún hefur ekki gengið heil til skógar eftir það, virtist sem eitthvað hafi farið úr lið eða skaddast og hún gat ekki gengið alveg eðlilega. Við vorum eiginlega viss um að hún gæti ekki átt fleiri folöld og bjuggumst við að þurfa að senda hana yfir móðuna miklu þar sem ekki var einu sinni hægt að nota hana lengur til reiðar. En viti menn, lítil jörp hryssa skoppar við hlið hennar og merin sjálf virðist hafa skánað við að kasta. Kannski eitthvað hafi hrokkið á réttan stað við það, hver veit? ;o) Allavega gladdi ég pabba gamla í dag þegar ég hringdi í hann og tilkynnti honum þetta :o)

Það er hægt að telja á fingrum annarrar handar hversu margir lesa þetta blogg, ég skil ekki alveg til hvers ég er að skrifa hérna eiginlega. Ok..........reyndar ágætis afstressun að setjast við tölvuna og skrifa eitthvað um ekkert, hvort sem það er lesið af einhverjum eður ei. En þið fáu hræður sem rambið hingað; ykkur er óhætt að kommenta hér sko ;o)
Hallfríður mín, þú færð nú koss á beran bossann fyrir að commenta hér hjá mér- það mættu fleiri taka þig sér til fyrirmyndar *hóst*.......takið til sín sem eiga..... *Ennþámeirahóst*

Ciao

Nýjasta nýtt

2006-05-31T13:24:00.000Z

Það kom kálfur í heiminn hér á bæ í gærkvöldi. Fyrsti kálfurinn í okkar búskapartíð. Og ef ég á að segja þetta á fallegri íslensku, að þá var beljan koooooooooooolvitlaus. Við máttum hringja í Reyni sterka og fá hann til að hjálpa okkur að færa hina kusuna, svo þessi gæti verið brjáluð alveg alein með kálfinum sínum. Jedúddamía.
Þetta er svört kvíga og fékk það virðulega nafn Janine Maria Magdalena, í tilefni þess að stúlkan sem býr hjá okkur heitir einmitt þessu nafni og átti afmæli í gær. Lágmark að fá nöfnu á afmælisdaginn sinn ekki satt...
Af kisumálum er það að frétta að það er einn kettlingur eftir. Einn framdi sjálfsmorð með skóreiminni hans Ragnars og Stebbi bróðir ætlar að fá einn. Ragnar Logi er búinn að skíra þann sem eftir er, hann heitir víst Tossi.
Það eru komin 11 folöld, ættu að koma 10-11 í viðbót ef útreikningar standast. Nóg að borða í haust nammi namm.... ;o)
Þessar fáu skjátur sem eftir eru ætla að halda í sér eins lengi og þær geta. Enginn gemlingur borið í tvo daga og ég er orðin hundleið á að fara út á nóttunni. Kolbrún vaknar alltaf þegar ég kem inn aftur og vill þá ekki fara að sofa. Bara leiðinlegt.
Ragnar fer í sjónmælingu á morgun, svo verð ég að bruna suður enn eina ferðina til að velja nýtt sett á trýnið á honum. Eins og mér finnst nú gaman að fara til Reykjavíkur eða þannig...

Jæja, best að byrja ekki oft skarpt að blogga svona eftir sauðburðinn, gæti endað með að ég geldist upp ;o)

Fjúff...

2006-05-26T03:24:00.001Z

Jæja já, ég er á lífi. En er orðin þreyttari en andskotinn eftir þennan sauðburð. Eins og maður er spenntur yfir því að sauðburður byrji er maður SVAKALEGA feginn þegar honum lýkur!
Lifandi lömb eru vel yfir sjöunda hundraðið eins og staðan er í dag, en það eru líklega um 40 hausar allavega sem eru eftir að bera og þar af er um helmingurinn gemlingar. Þetta er bara búið að ganga bærilega, það hefur þurft að hjálpa talsvert í ár, mikið af lömbum sem eru að koma öfug.
Og við erum búin að fá væna súpu af litum, ég ætla nú ekki einu sinni að reyna að telja þá upp, væri fljótlegra að telja þá sem ekki eru komnir held ég! Alltaf gaman að fá liti með ;o)

Það var skítaveður hérna á mánudag, þriðjudag og miðvikudag, snjóaði og var bálhvasst. Gátum sett aðeins út fé í dag, enda ekki veitir af þar sem að líklega eru rúmlega 500 lömb inni! Og það er sko ekki gaman. Lömbin orðin svo stór að þau eru út um allt og upp um allt. Allir garðar fullir af óþekkum lömbum sem vilja helst hvergi vera nema þar sem þau eiga ekki að vera...

Við erum búin að fá ágætis aðstoð þennan sauðburðinn; tengdapabbi eins og venjulega, tengdamamma var eitthvað líka, Gústi, Ragnheiður og svo líka þýska stúlkan sem býr hjá okkur þessa dagana. Gísli og Gústi fara um helgina og Ragga líka, þannig að það stendur til að hafa grillveislu í kvöld áður en liðið fær að fara heim :o)

Svo bara vona ég að það verði alveg roooooooooooooooooosalega fáar kindur eftir að bera þegar helgin er liðin. Ég vil gjarnan fá að fara að sofa á nóttunni aftur takk!

Læt þetta duga í bili, hef ekki heila fyrir meeeeeeeeeee.....ira skriferí í bili.

Allt og ekkert

2006-04-28T17:08:00.000Z

Svo sem ekkert að frétta, ákvað samt að setja eitthvað hérna inn til að fólk viti að ég er þó á lífi...

Það hafa ekki bæst fleiri lömb við enn sem komið er, sauðburður á svo sem ekkert að byrja fyrr en um 6. maí heldur. Það eru samt nokkrar sem gætu borið eitthvað fyrr, ellismellirnir fengu glaðninginn sinn á undan hinum skjátunum, en það var bara af því að hrúturinn var svo fjandi léttur á sér og hélst ekki á sínum stað. Það er bara vonandi að Ragnar Logi fái glaðning á afmælisdaginn sinn, og ekki værri það verra ef það væru kindurnar hans :o)

Vorum að setja brynningu upp í gömlu húsunum í gær, Ingvar á Kolugili var að hjálpa okkur. Stefnt er svo að klára nýju húsin í kvöld. Þetta átti náttúrulega að vera löngu búið, alveg eins og ég ætlaði að vera löngu búin að temja þessi 7 hross sem standa inni í hesthúsi. Skelfilegt. Svo er ekkert hægt að gera núna af því að gerðið er orðið ógeðslegt, bara drullusvað! Reyndar er allt svo skelfilega blautt að það er varla hægt að ganga nokkurs staðar án þess að skilja gúmmístígvélin eftir í drullunni. Og ég er sko búin að gera það nokkrum sinnum...

Ég keypti mér þurrkara um daginn, verslaði hann auðvitað af Stebba í Húsasmiðjunni. Fínasti þurrkari, þvílíkur munur að vera ekki með þvott út um allt hús að reyna að þurrka hann. Svo er líka búin að vera glampandi sól síðan ég keypti hann!

Ég frétti af "katta" vinnukonunni í dag, hún ætlar víst að fara heim mun fyrr en hún ætlaði sér. Ísland er víst ekki alveg eins æðislegt og hún hélt. Skilur ekkert í þessu trjáleysi hérna td., henni finnst landið svo tómlegt eitthvað. Hún hefði nú átt að kynna sér það áður en hún anaði af stað! Allavega ætlar Garðar EKKI að fá fleiri vinnukonur, nennir ekki að standa í svona lotteríi. Svei mér þá, ég held að hann hafi bara verið nokkuð ánægður með alla kettina í þetta skiptið ;o)

Svo virðist það nú vera ansi algengt að þetta fólk segir ekki alveg satt í sambandi við hvað það kann og getur, einn maður hérna í sveitinni fékk vinnukonu sem átti að vera þrælvön hestum og börnum. Hún gat svo ekki einu sinni haldið í hest án þess að fara að vola og börn voru hin mesta skelfing í hennar augum. Hún var víst send heim hið snarasta...

Jæja, best að skella sér í pizzu baksturinn, það er jú föstudagur í dag ;o)
Góða helgi!

Ekki er öll vitleysan eins..

2006-04-22T21:53:00.000Z

Við skelltum okkur suður á sumardaginn fyrsta, en við vorum að ná í þýska stelpu sem ætlaði að vera hjá okkur í 5 vikur. Nýttum ferðina og fórum með gleraugun hans Ragnars og pöntuðum ný, ég ætlaði líka að kaupa mér þurrkara í ferðinni en mér leist svo andskoti illa á þennan sem ég skoðaði að ég hætti við það. Sem var eins gott því að það hefði ekki komist eitt smjörstykki í viðbót inn í bílinn eftir að við vorum búin að láta greipar sópa í Bónus ;o)

Nú, stelpugreyið þýska entist ekki nema 2 daga hjá okkur...
Það vildi nefnilega svo skemmtilega til að hún er með ofnæmi fyrir köttum, hún bara rétt sí svona gleymdi að minnast á það þegar hún sóttist eftir að koma til okkar. Og eins og staðan er í dag eru 7 kettir á kotinu. Ég, sem er svo glær í öllu svona datt ekki einu sinni í hug að spyrja að því, þar sem hún jú vildi komast á sveitabæ með mörgum dýrum á!

Þannig að hún er núna komin í sveit á Vatnshorni, við skulum bara vona að það eigi eftir að blessast og að engir kettir fari að kíkja í heimsókn til þeirra næstu 5 vikurnar...

...

2006-04-17T11:41:00.000Z

You Belong in Dublin

Friendly and down to earth, you want to enjoy Europe without snobbery or pretensions.
You're the perfect person to go wild on a pub crawl... or enjoy a quiet bike ride through the old part of town.

What European City Do You Belong In?

Páskalömb!

2006-04-17T09:57:00.000Z

Þegar Garðar kom í fjárhúsin í gærmorgun (páskadag) voru komin 2 lítil lömb í heiminn. Alltaf gaman að fá svona páskaglaðning ;o)
Svo eftir hádegi bar önnur kind tveimur lömbum- það er bara rífandi gangur í þessu! Sú kind átti reyndar ekki að vera til lengur, en eitthvað hefur það misfarist hjá okkur að senda hana til himnaríkis blessunina. Það er vonandi að hún tóri eitthvað áfram, ég nenni ekki að vera með heimalninga strax!

Höfðingi í heimsókn

2006-04-15T16:39:00.000Z

Set hérna inn mynd af Jóni gamla í Gautsdal (afa Garðars), en við buðum honum í mat í dag. Garðar fór og náði í hann í morgun og keyrði honum svo aftur heim eftir kaffi.
Alltaf gaman að fá hann í heimsókn, það eru nú ekki margir eftir eins og hann skal ég segja ykkur...

Páskar!

2006-04-12T21:39:00.000Z

Jibbbbbííí! Ég er komin í páskafrí og er alveg með eindæmum fegin! Reyndar á ég heldur ekki eftir nema tvær vaktir og þá er ég komin í sumarfrí, eða réttara sagt sauðburðarfrí. Skiptir ekki máli hvað það kallast, ég verð allavega heima hjá mér og því er ég fegin :o)
Var að vinna í dag og það var alveg svakalega mikið að gera, lappirnar á mér eru mauksoðnar alveg. Það virðist vera algjört möst þessa dagana að hafa öll rúm í notkun á stofnuninni, sem er svo sem ágætt EF það er nóg starfsfólk á vakt......sem er ekki alltaf!

Svo er bara stefnt á að slappa af alla páskana, borða góðan mat og nammi og góna á imbann með börnunum. Getur ekki verið betra :o)

Gleðilega páska þið fáu hræður sem lesið þetta og hafið það gott yfir hátíðina.

Mjá

2006-04-11T02:57:00.000Z

Ég horfði á Idolið á föstudagskvöldið..........og svei mér þá ég var alveg himinlifandi að Snorri skyldi vinna þetta eftir allt saman. Ína var bara ekki nærri því eins góð og Snorri og hann er vel að titlinum kominn. Samt er ég búin að halda með Ínu alla keppnina, svona getur þetta breyst!

Kolbrún var veik um helgina, hundslöpp alveg hreint. Er samt öll að koma til núna, orðin alveg jafn óþekk og hún var -eða svona eins og 1 og 1/2 árs gamalt barn getur verið! Bara sæt :o) Fínu krullurnar hennar haldast alveg, ég þori ekki fyrir mitt litla líf að klippa hana (nema rétt toppinn) því ég er svo hrædd um að krullurnar fari! Mamma myndi líka stúta mér ef ég myndi gera það.
Ragnar Logi sleppur alveg við allar pestir, ég held að Kolbrún sé nú kannski veikari fyrir því að það er jú ekkert svo langt síðan hún fór í leikskóla í fyrsta skipti. Ef ekki eru veikindi á leikskólum - þá eru hvergi veikindi held ég.

Heyrðu, já það bættust fleiri kisur við á kotinu, auðvitað þurfti kisuskömmin mín að spýta út 3 kettlingum á föstudaginn var. Ég segi nú bara guði sé lof að það komu þó EKKI NEMA 3!!! Ég bjóst við 10.
Bráðum verða fleiri kettir á Stórhól heldur en kindur með þessu áframhaldi :o(
Ég verð að fara að hafa sér kattar-blogg held ég, allt sem ég orðið skrifa hérna inn snýst um ketti!

Ég þarf svo heldur betur að fara að hella mér út í smíðarnar, nú þegar við erum komin á viðbúnaðarstig 2. í fuglaflensunni. Ég verð að útbúa heilmikið búr fyrir hænurnar mínar og endurnar ef ég ætla mér að láta þær lifa og leyfa þeim eitthvað út í sumar. Ekki seinna vænna að fara að hefja smíðarnar, Garðar sá tvær álftir í Reyðarlæknum í seinustu viku- öruggulega alveg baneitraðar.

Íslenskt veður.....I love it!!

2006-04-06T18:22:00.000Z

Já, það er búin að vera sannkölluð blíða hérna í dag....eða þannig. Að vísu heldur skárra en í gær, en þá þurfti ég að redda annarri á næturvaktina mína þar sem ég treysti mér sko alls ekki að keyra eins og veðrið var! Með ólíkindum að það þurfti að vera skítaveður fyrir þessa einu næturvakt sem ég átti að taka í þessari viku. Svona er þetta alltaf.
Reyndar sýnir þessi mynd ekki alveg hvernig veðrið er, það er eiginlega búið að vera kóf í kringum bæinn í allan dag, ég ætlaði mér að fara út og taka myndir en svo þegar ég var búin að reka trýnið út þá ákvað ég að taka bara myndir í gegnum eldhúsgluggann ;o) Miklu betra..

Svo eiga allir að horfa á Idolið á morgun..........OG KJÓSA ÍNU!!!

Skaðvaldurinn

2006-04-03T20:24:00.000Z

Ákvað að skella inn mynd af honum Tarzan, en hann er búinn að vera mér til mikils ama síðustu daga.
Eins og ég sagði í seinustu færslu, að þá hef ég staðið í miklu hekli dag eftir dag. Því miður er Tarzan alveg jafn spenntur yfir þessu, ég hef ekki undan að elta hann með garnhnyklana sem hann stelur frá mér um leið og ég dreg þá upp.
Fyrst tók hann bara þann rauða. Ef ykkur finnst Skvísa úfin og asnaleg að þá er hún EKKERT miðað við hnykilinn eins og hann lítur út í dag.
Þá tók ég mig til og faldi garnið í VEL lokuðum poka uppi á hillu. Svo fór ég út og þegar inn var komið að nýju lá pokinn sundurtættur á eldhúsgólfinu og hnyklarnir 3 horfnir undir sófann. Og þeir litu allir út eins og Skvísa.
Ég skal viðurkenna að ég var anskoti reið.
Ég náði ekki mynd af Bangsa, hann vissi greinilega að Tarzan var að gera einhver skammarstrik og faldi sig inni á klósetti meðan á myndatökunni stóð....

2006-03-31T10:42:00.000Z

Komin helgi einu sinni enn, mars er búinn að líða svo hratt finnst mér.
Ég fór á Krókinn á miðvikudaginn, mamma vildi endilega fá guttann lánaðann um helgina en það átti að vera svo leiðinleg færð að þau treystu sér ekki til að keyra hingað. Þannig að hetjan ég brunaði bara á stað....það var reyndar autt eiginlega alla leiðina ;o) En ég er samt hetja sko....
Það var mót í reiðhöllinni, ég nennti ekki að horfa á allt þannig að ég kom bara þegar skeiðið byrjaði og fylgdist með því. Spói lá hvorugan sprettinn hjá pabba, ég held að hann hafi vitað að ég væri að fylgjast með því hann liggur yfirleitt ekki þegar ég er að horfa ;o) Ég er best geymd heima.
Fór á danska daga í Skaffó, þeir voru satt best að segja ekki merkilegir. Bara venjulega draslið sem þeir selja alla daga á "einstöku" tilboði.
Svo verður maður náttúrulega að fylgjast með Idolinu í kvöld, ég held að Ína taki þetta. Að vísu finnst mér hún hálf freðýsuleg þegar Simmi og Jói eru að tala við hana, virðist ekkert geta sagt neitt greyið stúlkan nema já og nei. En hún getur sungið, hún má eiga það ;o)

Ég er byrjuð að hekla aftur, búin að vera heila eilífð að hekla mér svona inniskó. Búið að kosta mig blóð, svita og tár. En... mér tókst að klára annan skóinn í gærkvöldi....og auðvitað er hann allt of stór. Ég verð að setja stuffing inn í hann ef hann á að haldast á mér. Svo á ég aldrei eftir að geta gert annan alveg eins. Skil ekki hvernig mér datt þetta í hug. Ég hugsa að Garðar fái bara að ganga í þeim, þeir eru líklega temmilegir á hann...

Gengur á ýmsu

2006-03-28T18:01:00.000Z

Það er skítaveður hérna dag eftir dag, enda var þetta orðið ískyggilegt allt saman- gott veður í marga daga í röð! Það gat ekki enst til lengdar, maður fær það alltaf í hausinn aftur ef það kemur svona gott veður á veturna :o( Vonandi verður bara vorið gott....

Við losnuðum loksins við folöldin sem við vorum búin að selja, búin að hafa þau inni í mánuð en þau áttu bara að vera í nokkra daga inni hjá okkur. Buið að taka þetta lið hálft ár að borga þessi grey og ekki enn búið reyndar. Ég varð svo reið út í einn gaurinn að ég neitaði að selja honum folaldið og endurgreiddi honum þær fáu krónur sem hann var búinn að borga. Ég nenni hreinlega ekki að standa í svona bulli og vitleysu. Þannig að það er eitt folald inni ennþá, gullfallegt alveg hreint. Þannig að ef einhverjum langar í leirljóst, flott hestfolald- talið við mig ;o) Ég hef EKKERT að gera með fleiri ásetningsfolöld!

Við erum annars búin að redda okkur fola í hryssurnar fyrir sumarið, ég setti auglýsingu á 847
og það gjörsamlega rigndi inn folum ;o) Misjafnir voru þeir eins og þeir voru margir, en ég held að við höfum fengið fínan hest í merarnar, hann er allavega vel ættaður :o)

Við fórum á Blönduós í gær og kíktum á húsið hjá Víði, það er bara orðið flott hjá þeim. Þau eiga að vísu eftir að koma sér almennilega fyrir, það er ekki hægt að gera allt í einu. Óliver litli er ekkert líkur pabba sínum finnst mér, sænska genið er greinilega sterkara en það íslenska ;o)
Nonni er svo búinn að selja....og kaupa, það vantar ekki stælinn á þetta lið þarna á Blönduósi! Og tengdó kominn á nýjann Passat, hann er svo flottur að ég efast um að ég eigi nokkurn tímann eftir að þora að setjast upp í hann! Össsssssssssss.....

Gústi kíkti í heimsókn á föstudaginn og gisti hjá okkur, hann er alltaf jafn hress og kátur. Það er vonandi að hann komi í vor, hann er nauðsynlegur í smíðarnar ;o) Það er nefnilega þannig að þessar helvítis grindur til að stía í sundur með, hverfa alltaf þegar líður fram á haustið. Þeim er dröslað hingað og þangað og notaðar út um alla jörð. Og þær skila sér aldrei aftur. Það er öruggulega búið að smíða 500 grindur hérna gegnum árin en ekki nema 20-30 grindur til. Skil þetta ekki...

Ofboðslega getur lífið verið erfitt

2006-03-22T10:37:00.000Z

http://bebbaoghjolli.blogspot.com
Það sem er á suma lagt :o( Ég get ekki ímyndað mér hvernig er að vera í þessum sporum, bíða og vona-dag eftir dag eftir dag. Svo er maður að væla yfir einhverju smotteríi, einhverju sem skiptir ekki nokkru máli. Ég þekki þetta fólk ekki neitt en ég hugsa til þeirra á hverjum degi og vona að allt eigi eftir að fara vel...

Helgin búin...

2006-03-20T18:08:00.000Z

og hún var bara alveg ágæt. Fór í Kambshól og sá kálf fæðast, Jón var búinn að lofa að hringja í mig og láta mig vita þegar það væri von á kálfi í heiminn og auðvitað kom eitt stykki á afmælisdaginn minn c",)

Þau gömlu komu frá Króknum og voru svo elskuleg að gefa mér blómvönd í tilefni dagsins. Pabbi sagði ekki orð yfir öllum köttunum (og það er mjög óvenjulegt!), ætli mamma hafi ekki verið búin að lesa yfir honum áður en þau komu...reyndar var hann svo bara nokkuð hrifinn af þeim.
Vignir, væntanlegur stórbóndi, kíkti svo í kaffi um kvöldið og bullaði í okkur eins og honum er einum lagið. Kvöldið endaði á að horfa á hreint viðbjóðslega mynd; SAW eða eitthvað álíka hét hún. Það er nú bara ein sú allra skuggalegasta mynd sem ég hef horft á lengi! Enda fékk ég allsvakalega martöð um nóttina, ég var alveg dauðþreytt þegar ég loksins vaknaði!

Á sunnudeginum komu svo Gísli og Stína, við settum fullorðinsmerki í öll lömbin, þannig að nú er óhætt fyrir búfjáreftirlitsmanninn að koma ;o) Stína var ekki yfir sig spennt yfir kisunum, hún var bara svo dönnuð að hún sagði ekkert við mig nema:"Kattarhelvíti...". Mjög vel sloppið að mínu mati...

Helga ætlar að gera skattframtalið fyrir okkur, þannig að núna þarf ég bara að drattast til að senda henni alla pappíra. Mikið er ég fegin að gera þetta helvíti ekki! Svo þarf ég að leggja lokahönd á gæðastýringarpappírana, svona hitt og þetta smotterí eftir.
Nóg af bulli í þetta sinn,
Adios

Þá vitið þið það

2006-03-19T17:47:00.000Z

Your Animal Personality

Your Power Animal: Deer

Animal You Were in a Past Life: Panda

You are a fun-seeker - an adventurous, risk-taker.
While you are spontaneous, you are not very rational.

The Animal Personality Test

http://www.blogthings.com/theanimalpersonalitytest/

Og ég sem ætlaði að baka svo mikið

2006-03-17T15:07:00.000Z

Ég ákvað að prófa almennilega nýju eldavélina mína í morgun og skellti í köku, haldið þið þá ekki að öll kökuformin mín hafi farið með gömlu eldavélinni á Blönduós! Útkoman varð kringlótt bananabrauð og einhversskonar súkkulaði muffins. Býst við að þetta bragðist ágætlega þrátt fyrir öðruvísi útlit en vant er. Ég þoli mjög illa svona uppákomur, allt of vanaföst í bakstrinum til að meika svona útlitsbreytingar á kökum. Og svo finnst mér bragðið ekki vera eins og það á að vera heldur. Læt því meiri bakstur bíða betri tíma.

Tíminn líður svo hratt

2006-03-16T20:08:00.000Z

Ég gekk frá sumarfríinu mínu í dag, fer í frí 24. apríl og byrja aftur um miðjan júní. Víííííí!!!! Mikil tilhlökkun skal ég segja ykkur! Svo förum við út líka í ágúst, össsss.......bara endalaust frí hjá manni ;o)
Ég er annars komin í langþráð helgarfrí, búin að vera svo þreytt eitthvað upp á síðkastið (ok, löt). Svo verður maður víst árinu eldri á laugardaginn, ætla nú ekkert að halda upp á það, kannski í mesta lagi gráta ;o) Verra verður það fyrir Gassa minn þegar hann á afmæli næst, hann kemst nefnilega á fertugsaldurinn...hehehe.....
Jæja, best að hætta þessu , stíft kvöld í kvöld hjá okkur; Gettu betur, Nip/tuck, Desperate houswifes, endursýning á LOST og loks American Idol. Meiri andskotinn að troða öllum góðu þáttunum á þennan eina dag, mætti halda að þeir vissu ekki að það væru fleiri dagar í vikunni :o/

Berrassaðar, tamdar rollur

2006-03-14T16:53:00.000Z

Garðar skellti sér á hvolpanámskeið um helgina......og OH MY GOD!!!! Fjúff, það verður meiri vinna með þennan eina hund heldur en bæði börnin, hina rakkana, kettina og fiðurféð. Hundræksnið má ekki elta hross, fugla, hunda, bíla -semsagt ekki elta neitt sem hreyfist. Hann á samt að sýna skepnum áhuga en ekki hamast í þeim (mjöööööög auðvelt fyrir 3. mánaða hvolp-eða þannig!). Við þurfum svo að hafa kindur hér heima við í sumar til að æfa tíkina en fyrst þurfum við að fá einhvern með taminn hund til að temja rollurnar fyrir Pílu. Jahá. Garðar er farinn að hallast að því að það sé auðveldara að fara bara með allar rollurnar á námskeið...og skilja bara hundinn eftir heima. Og ég held barasta að ég sé pínu sammála honum.

Lítið gerist í hestamennskunni hjá okkur, við erum eiginlega að bíða eftir manni sem ætlaði að grafa niður lónseringarstaur fyrir okkur en hann er ekki búinn að koma enn. Þannig að maður gerir lítið annað en að dunda við þau á básnum, það er svo sem ágætt líka, manni langar bara að fara með þau eitthvað út í blíðviðrið og eiga við þau þar. Það hefur ekkert verið átt við flest þeirra þannig að það gengur ekki fyrir mig að lónsera þau nema að hafa staur, ég yrði eins og tuskubrúða á kaðlinum býst ég við.
Garðar er í rúning á fullu þessa dagana. þannig að hann er ekkert að sóa tímanum í hrossin. Það er með öllu óskiljanlegt að það skuli ekki vera búið að finna upp eitthvað til að losna við að rýja skjáturnar, einhverja vél sem er hægt að henda rollunni inn í og hún kæmi út berrössuð og alsæl. Þvílíkur lúxus sem það nú væri!

Búin að taka inn hross

2006-03-07T10:46:00.000Z

Svei mér þá, það hafðist hjá okkur að taka inn hrossin! Við sendum börnin í pössun á Krókinn og svo voru allsherjar þrif og tiltektir alla helgina. Við tókum svo inn á sunnudeginum, heil 7 hross og ótrúlegt en satt að þá er bara eitt brúnt! Jahérna, ég bjóst nú aldrei við því að hafa bara eitt brúnt hross inni, venjulega eru þau flest brún- kannski eitt rautt sem fær að fljóta með :o) Einn mósóttur, ein bleik, brúnskjótt, rauðblesótt, rauðstjörnótt og rautt. Nú er bara að fara að drullast til að temja þetta, maður er alltaf svo sperrtur fyrst sko...en svo sofnar löngunin þegar maður fer að sjá að maður hefur bara engan tíma fyrir þetta!
Ég tók Galdurssoninn minn inn, hann er á fimmta og hefur ekkert verið átt við hann. Hann var svo heppinn að vera settur á bás við hliðina á beljudruslunni sem er alveg kolvitlaus ennþá. En hann kippti sér nú ekki mikið upp við það, beit hana bara í hausinn ef hún var að ybba sig. Að vísu endaði með að við urðum að flytja hann því að beljan var alveg hætt að éta, hún hnoðaði bara stanslaust milligerðið og var orðin rennsveitt á þessum endalausa hamagangi. Allavega held ég ekki að ég þurfi að hafa áhyggjur af að temja hann Skjóna minn, hann var alveg pollrólegur yfir þessu öllu saman og hélt bara áfram að japla á sínu heyi.

Það var alveg stórskrýtið að vera barnlaus alla helgina, ansi tómlegt verð ég að segja. Við fórum á töltmótið á Blönduósi á föstudagskvöldið (já, fórnuðum Idolinu fyrir það!) og vorum orðin blá af kulda þegar þessu loksins lauk. Samt gaman að fara svona einu sinni, við höfum ekki farið á mót þarna síðan 2001 ef mig minnir rétt.

Við létum telja fóstur í lömbum og veturgömlum í seinustu viku, það kom svona bærilega út. Ekki nema 13 geldir í gemlingunum sem er held ég fínt, en þeir eru 144 í heildina. Veturgömlu eru ekkert spes, 25 einlembdar af 84. Máttum svo sem vita það þar sem ekki var haustrúið. Það munar alltaf miklu á frjóseminni ef ekki er rúið að hausti, verður ekki eins mikil sæld í þeim. En við huggum okkur við það að það var þó engin geld :o)

Hunda- og kattabúskapurinn gengur vel, engir stórir árekstrar orðið milli manna, katta og hunda ;o) Garðar fer á hvolpanámskeið um næstu helgi, það verður gaman að sjá hvernig gengur með Pílu. Hún er ósköp góð greyið, en hún pissar bara út um allt - svona hræðslupiss! Það má varla segja nafnið hennar að þá pissar hún á sig. Svolítið þreytandi en það rjátlast vonandi af henni þegar hún stækkar.
Jæja, nóg af bulli í bili-
OVER AND OUT

Nú er ekki aftur snúið

2006-03-01T16:58:00.000Z

Já, flugmiðarnir okkar komu með póstinum í dag; fyrir ykkur sem ekki vitið hvað ég er að tala um að þá erum við Garðar að fara í míni brúðkaupsferð til Sviss í sumar. Við fljúgum út 1. ágúst og komum aftur til landsins (þeas. ef við verðum ekki fuglaflensunni að bráð...) 10. sama mánaðar.
Þannig að ég segi bara Vííííííííííí!!!! Búin að bíða eftir þessari ferð í 2 ár og nú SKAL farið!

Garðari er farið að kvíða þetta ferðalag allverulega skal ég segja ykkur. Hann er viss um að verða skotinn af einhverjum terroristum, því hann er víst svo sveita-lúðalegur. Nú og ef þeir missa marks, þá mun það verða fuglaflensan sem sér um að stúta okkur. Já, hann er alltaf jafn bjartsýnn þessi elska c",)

Ég segi nú bara skítt og helvede með þessa fuglaflensu, hún getur nú alveg eins drepið mig hérna á klakanum eins og í útlandinu, því hún hlýtur hvort eð er að koma hérna í vor. Ég er farin að stórefast um að Garðar eigi nokkuð eftir að sjást í sauðburðinum, hann verður aaaallt of upptekinn af að liggja fyrir fuglunum og plaffa á þá ef þeir ætla sér að lenda hér á landareigninni...

Tóm leiðindi bara

2006-02-26T18:10:00.000Z

Já, það herja veikindi á Stórhólnum, Kolbrún er búin að vera alveg hundveik seinustu 3 daga, Ragnar veiktist í gær og ég er svo komin með þetta helvíti líka. Þá er bara einn á heimilinu sem er nokkuð heill og því miður er það ekki besti kokkurinn á heimilinu...
Ég spurði hann hvort að hann myndi nú ekki sjá um matinn í kvöld og hann leit á mig með furðusvip og sagði: "Erum við ekki búin að borða alveg nóg seinustu daga? Svo er nú til nóg af snakki í skápnum..." Ojjj þessir karlmenn stundum :0/ Það myndi fjúka í hann ef ég byði honum bara upp á snakk alla daga. Ef það væri hins vegar ís væri hann sáttur og glaður.
Þannig að ég bíð eftir hruni Garðars- það hlýtur að koma að því að hann fái þetta- og þá ætla ég ekki að þjónusta hann eins og vant er.
Ótrúlegt hvað kallar verða alltaf MIKLU veikari en konur. Ég á aldrei eins bágt og hann ef við erum lasin. Ég veit ekki hvaða jólasveinn fann upp á því að kvenkynið væri veikara kynið, sá apaköttur hefur greinilega aldrei séð eða hitt karlmann með flensu...

Og enn bætist við fjölskylduna...

2006-02-24T14:12:00.000Z

Já, ég ætla ekkert að segja neitt meira en það held ég, nema það að þeir eru rosalega sætir ;o) Þeir kostuðu þagnarbindindi á milli mín og Garðars í tvo daga...en svo gáfumst við bæði upp á því og hann er búinn að sætta sig við vesenið á mér. Hann segir að nú muni allir halda að við séum snargeðveik....en só wott...ég held að það viti það allir hvort sem er að við erum kolklikk!

Bætist við fjölskylduna..

2006-02-19T12:40:00.000Z

NEI....ég er ekki ólétt!

Já, eins og þið sjáið er komin nýr fjölskyldumeðlimur. Og já, núna erum við komin með 4 stykki takk fyrir!
Hún heitir Píla, þessi elska, og er hreinræktaður Border Collie. Nú ætlar Gassi minn að taka smalamennskur framtíðarinnar með trompi, stefnan sett á hvolpanámskeið í næsta mánuði og svo smalahundakúrs í haust. Geeeeeetur ekki klikkað ;o)
Já, við erum bæði algjörir sökkerar þegar kemur að litlum, sætum hvolpum og kettlingum! Og ég er afskaplega ánægð með það, mikið betra að réttlæta vitleysuna sem manni dettur í hug þegar maki manns er engu skárri...

Já....svei mér þá -Silvía Nótt rúlar!

2006-02-05T19:13:00.000Z

Ég hef nú ekki verið hrifin af henni hingað til, en hún er barasta með eina almennilega lagið í Júróinu í ár. Lagið sem Regína syngur er allt í lagi jú, að vísu man ég ekkert hvernig það er ;o) Hins vegar glymur Til hamingju Ísland í hausnum á mér allan daginn. Ég bjóst ekki við að ég myndi segja þetta en............................................................
ÁFRAM SILVÍA NÓTT!!!!!

Endalaus skil á hinu og þessu :o(

2006-02-02T15:02:00.000Z

Ég er alltaf að skila einhverju inn; fyrst voru það hrossaskýrslurnar svo fjárbókhaldið, núna styttist í virðisaukaskattinn og helvítis skattframtalið fer alveg að koma. Þetta er nú eitthvað gruggugt með þetta skattframtal, mér finnst ég skila því MUN oftar en einu sinni á ári! Ég er alltaf að gera skattframtalið!! Hvernig er þetta helvíti hægt??? Svo er launamiða mánuður í þokkabót.....AAAAAAAARG!!!!!!!!!!!
Reyndar var ég að klára fyrst núna afkvæmarannsóknina fyrir hrútana, sendi það frá mér í gær- guði sé lof að það er búið! Búið að hvíla þungt á mér svo vikum skipti, en náttúrulega kom ég því aldrei í verk.
Við fengum svo merkin í ásetningslömbin í gær, og auðvitað gleymdi ég að panta í hrútana þannig að ég verð að panta aftur...hvernig er hægt að vera svona??

Ragnar Logi er kominn í langþráð frí á Krókinn, verður þar yfir helgina og svo er skírn hjá Víði og Lindu á sunnudaginn. Miklar vangaveltur um nafnið, verður öruggulega eitt íslenskt og eitt sænskt nafn ;o) Kemur í ljós.....
Annars mátti hann varla vera að því að fara, þar sem að ORKUBÓKIN kom í pósti í dag. MIKILL spenningur yfir öllum þessum límmiðum! OG loksins getum við kannski farið að ala drenginn almennilega upp, því hann tróð í sig einum banana og drakk tvö glös af vatni ÁÐUR en hann var búinn að opna bókina!!

Það er bara svo æðislegt veður dag eftir dag, vonandi verður þetta bara svona fram á sumarið, þá verð ég glöð :o)

Þorrablótið búið

2006-01-30T18:22:00.000Z

Já, svei mér þá....þetta hafðist barasta af hjá okkur í þorrablótsnefndinni! Að sjálfsögðu var þetta laaaaaaaaaaangbesta þorrablótið sem haldið hefur verið, ekki að spyrja að því sko :o) Ég var veislustjóri og las annálinn og ég bara komst svona nokkuð skammlaust í gegnum þetta. En mikið svakalega var erfitt að stíga á sviðið fyrst um kvöldið! Fjúfff...........mikið er gott að þurfa ekki að standa í þessu á næstunni!

Ég skellti mér suður með Ragnar Loga í seinustu viku, hann var svæfður hjá tannlækninum og gert við allt heila klabbið í einu. Gekk bara alveg eins og í sögu allt saman. En ROSALEGA er tímakaupið gott hjá þessum gaurum, váááá.......!! Það er eins gott að Ragnar passi vel upp á tönnslurnar eftir þetta. Mikill peningur fyrir viðgerðir sem detta úr eftir nokkur ár!

Við gistum hjá Stebba bróður, það var mjög fínt bara- hann er alltaf jafn yndislegur kallinn ;o) Það var ekkert gert á mánudeginum annað, þar sem að Ragnar var náttúrulega eftir sig eftir svæfinguna. Á þriðjudeginum átti heldur betur að taka borgina með trompi, fara búð úr búð og skoða allt sem aldrei er tími til að skoða. Það var svo náttúrulega enginn tími í það frekar en fyrri daginn, þó að Stebbi greyið hafi verið boðinn og búinn að sýna manni allt sem maður vildi sjá. Ég skellti mér í tattoo, það fóru nú bara tveir og hálfur tími í það, svo fór ég í klippingu og litun........og þá var nú bara dagurinn búinn! Reyndar endaði með að ég mætti klukkutíma of seint í klippinguna þar sem að tattooið tók svo langan tíma. Þannig að það var nú bara ekkert mikið verslað í ferðinni, enda svosem bara allt í lagi þar sem mig vantaði nú ekkert sérstakt ;o) Það er bara svo gaman að versla SAMT! Ég fór í slatta af fatabúðum en það var bara allt sem ég skoðaði í dvergastærðum, ég er nú ekki feit, en ég fann bara ekkert sem mér líkaði sem ég gat komist í. Þannig að ég gaf það fljótlega upp á bátinn og keypti föt á Ragnar Loga í staðinn.
Og..........já ég keyrði sjálf í Reykjavík! Það gekk nú bara furðanlega vel skal ég segja ykkur, ég villtist bara ekki neitt :o) Nú get ég farið að fara vikulega bara, í stað þess að fara á 3-4 ára fresti...

Hver ætlar að keyra fyrir mig??

2006-01-20T10:24:00.000Z

Já, það styttist óðum í Reykjarvíkurferðina mína, ég verð vafalaust ekki vinsæl á götum borgarinnar- en só wat- við Gassi erum vön að láta flauta á okkur þegar við förum suður, núna verð ég að vísu bara ein á ferð til að taka við flautinu! Ég fer eftir hádegi á sunnudaginn, Ragnar á tíma á mánudagsmorguninn, þetta á að taka um tvo tíma held ég. Svo verður maður nú að versla eitthvað, eru ekki útsölur alls staðar?!

Það styttist óðum í þorrablótið líka, æfingar ganga hægt en öruggulega skulum við segja...

Við erum ekki farin að taka inn hross ennþá, ætli við rífum ekki inn um mánaðarmótin. Ætli það séu ekki ein 7 stykki sem þarf að koma stand, við erum orðin allsvakalega ódugleg við þetta eitthvað. Við þurfum bara að færa kusurnar eitthvað til í húsinu, það GÆTI orðið bölvaður hausverkur, svarta beljan er alltaf kolvitlaus. Karamella er orðin nokkuð spök, ætli hin endi ekki í sláturhúsinu bara; allavega ef hún verður svona áfram.

Kolbrún og Ragnar eru byrjuð á leikskólanum, Ragnar er voðalega ánægður með það og Kolbrún reyndar líka. Ekkert vesen með það. Þetta er ágætt, bæði fyrir þau og mig! Nú hlýt ég að koma miklu meiru í verk....hmmmmmmmm...........

Enn einn höfuðverkurinn..

2006-01-11T15:33:00.000Z

Já, það er komið að hinu árlega þorrablóti hér í sveit og það vill svo skemmtilega til að við erum í þorrablótsnefndinni. Og þetta er alltaf sama sagan, maður er alveg tómur í kollinum varðandi hugmyndir að skemmtiatriðum. Nú þarf að pæla út og finna hvað hver og einn í sveitinni gerði af sér á síðastliðnu ári, allar hugmyndir eru vel þegnar :o)
Þorrablótið verður 28 janúar næstkomandi, og við erum búin að halda alveg einn fund! Rífandi gangur í þessu hjá okkur.....

Svo lítið að frétta....

2006-01-07T16:43:00.000Z

Góðan og blessaðan daginn og gleðilegt nýtt ár!
Allt gott að frétta af Stórhólnum, það er komið nýtt ár hjá okkur líka eins og vonandi ykkur flestum ;o) Áramótin liðu áfram tíðindalaust, ég var að vinna á gamlárskvöld en afgangurinn af famelíunni fór á Blönduós í mat og á flugeldasýningu. Ég var svo komin heim úr vinnunni kl. 23:30 og sat ein og yfirgefin hérna heima þegar nýtt ár gekk í garð. Svosem ágætt því þá gat ég horft á gamla árið hverfa og það nýja koma í friði og ró - venjulega hefur maður verið úti í garði hjá tengdó að skjóta rakettum á þeim tíma. Mér finnst það alltaf hálf sorglegt þegar gamla árið hverfur, það hefur enga von um að komast til baka aftur greyið.

Við keyptum okkur jeppa um daginn, já það hafðist hjá mér að bæta enn einu farartækinu á bæinn! Þetta er Nissan Patrol, alveg fínasti bíll þó ég segi sjálf frá ;o)
Og auðvitað verslaði ég hann í gegnum Barnaland, það er ýmislegt hægt að finna þar skal ég segja þér!

Það er búið að vera bölvað bras með Ragnar og tennurnar hans, ég mátti bruna með hann á Krókinn í neyðartannlæknaferð. Ég fer svo suður með hann 23. janúar, og þá verður hann bara svæfður og gert við allt í einu. Þannig að Stebbi minn- farðu að undirbúa þig undir komu okkar ;o) Það verður ekkert grín fyrir þig að fá svona hillbillís í heimsókn sko...
Annars finnst mér verst að ég skyldi ekki fara strax með hann á Krókinn eins og ég ætlaði mér, þessi tannlæknir var ALLT öðruvísi og það var bara ekkert vesen. Hann rauk ekki svona beint í munninn á drengnum og þá var þetta bara allt annað. Held að ég fari svo bara með hann í eftirlit á Krókinn frekar en hérna....

Ég fékk afganginn af jólagjöfunum í gær í póstinum, ekki seinna vænna ;o) Þetta kennir mér að vera aaaaaaaaaðeins tímanlegri fyrir næstu jól!

Jól jól jól jól jól jól....

2005-12-23T21:03:00.000Z

Já ef þið hafið ekki tekið eftir því fyrr að þá er bara að bresta á með jól einu sinni enn. Mér finnst jólin satt best að segja nýbúin að vera??! Svakalega hlýtur maður að vera orðinn gamall, tíminn líður aaaaaaaallt of hratt.
Annars er allt bærilegt að frétta héðan, enginn lasinn og rollurnar eru búnar að fá glaðningin sinn á þessu ári- semsagt hrútana. Það var barasta eiginlega ekkert sætt í ár, heilar fjórar kindur sem vonandi skila af ferhyrndu í vor. Já, það er mikil ræktun hér í gangi, aurunum eytt í forystufé og ferhyrnt sæði. Reyndar ætluðum við að sæða meira en við bara sprungum á tíma með það (eins og með svo margt annað hér á bæ...)en það verður bara að bæta það upp að ári.

Ég hef ekkert minnst á kusurnar mínar langa lengi, en þær eru bara að verða svona nokkuð prúðar skal ég segja ykkur! Kannski ekki alveg pollrólegar eeeeeeeeeen mikið rólegri en þær voru! Þetta verða alveg dýrindis skepnur eftir einhver ár- ég er alveg viss um það. Kannski ég breyti samt um skoðun þegar kálfarnir fara að koma í heiminn, ég hef heyrt að þá geti þær verið svolítið æstar greyin. Pabbi gamli vill að við sæðum þær- huh...hann ætti nú þá bara að koma sjálfur og troða prikinu upp í ****** á þeim!

Ragnar Logi er búinn að fara í þriðja skiptið til tannlæknisins og það gekk náttúrulega ekkert frekar en fyrri daginn. Þannig að við verðum að hafa okkur af stað í bæjarferð í janúar. Ekki okkar tebolli að þurfa að fara til Reykjarvíkur satt best að segja, erum bara sátt með það að fara í mesta lagi einu sinni á ári! Já ég veit- við ERUM sveitavargar! Ég ætti nú samt að skammast mín að vera ekki búin að heimsækja Stebba bróður oftar, *hóst* ég fer að bæta mig......ALVEG SATT! :o)

Ég er alveg hundfúl yfir að hafa ekki náð að kveikja á jólaljósunum á hlöðunni, við reyndum að tengja þetta saman þar sem það var sprungið, en þá sprakk bara alltaf nýr og nýr meter. Við erum búin að ákveða að græja þetta bara í sumar, svo þetta verði nú tilbúið hjá okkur fyrir næstu jól! En þetta fer alveg SVAKALEGA í taugarnar á mér að ná ekki að tengja þetta núna :o( Ég kannski haska mér út í fyrramálið...

Jæja, hafið það nú gott um jólin - ég ætla allavega að hafa það alveg rosalega gott skal ég ykkur segja ;o)

GLEÐILEG JÓL

Hvaða strumpur ertu??

2005-12-13T22:34:00.000Z

Find your inner Smurf!

2005-12-12T21:08:00.000Z

Ég kem engu í verk hér á þessum bæ- nema það snúist um fjárhúsin nýju. Ég er ekkert búin að baka, ekkert búin að þrífa (húsið er ískyggilega nærri því að kallast svínastía...), ekki farin að skrifa nein jólakort og flest allar jólagjafirnar pantaðar af Ebay....og ekki nema ein komin í mínar hendur. Svo er ég hætt að sofa af áhyggjum yfir því að fá ekki jólasteikina! Allir hamborgarhryggirnir verða öruggulega uppseldir þegar ég loksins kemst í verslunarleiðangur. Ég er farin að hallast að því að einhver hluti heilans hafi brunnið yfir á seinustu tveimur mánuðum, mér finnst ég allavega ekki getað hugsað heila hugsun lengur. HJÁÁÁLP!!!

Svo ég minnist nú enn og aftur á fjárhúsin að þá eru þau alveg gasalega fín. En ég verð samt alveg rosalega fegin þegar brynningarskálarnar verða komnar, það er bara tú möts að brynna í einhverja 15 stampa allavega 2x á dag. Ég hata orðið þessa stampa og mér langar mest til að snúa helvítis rollurnar úr hálslið þegar þær eru svona lystilega búnar að skíta ofan í hvern EINASTA STAMP! Þvílíkt jobb, vera með þessi fínu hús og vera svo á hlaupum hálfan daginn með slöngu í hendinni og fá ekki neitt í staðinn nema skít í stampi.
(Ef þið hafið ekki fattað það að þá er ég ekki í góðu skapi í dag...)

Ég er farin að undirbúa mig fyrir næstu tannlæknaferð, hrelli Ragnar á hverjum degi, niðurrifsstarfsemin alveg á fullu þessa dagana. Það verður engin tölva, engin jól, engin leikskóli, engin Sauðárkróksferð til ömmu og afa, engin lömb næsta vor og fleira og fleira. Mér tekst að finna eitthvað nýtt á hverjum degi. Það eru góðar uppeldisaðferðirnar hjá mér, finnst ykkur ekki? c",) Ég held að þetta sé að síast inn hjá honum, ég vona það allavega. Og viljið þið vinsamlegast minna mig á það þegar Kolbrún verður 3 ára, AÐ FARA MEÐ HANA TIL TANNLÆKNIS!!

Skjáturnar komnar inn :o)

2005-12-09T17:44:00.000Z

Já, ótrúlegt en satt- kindurnar eru komnar inn í nýju húsin! Þetta hafðist hjá okkur, ég var nú farin að halda að þetta ætlaði engann enda að taka- en það kom endi eftir allt saman (Halelúja!). Að vísu er sitt lítið af hverju eftir, en ekkert stórvægilegt. Bara svona smáhlutir eins og rafmagn og vatn..... ;o)
Þetta kemur bara vel út, að vísu kemst 1-2 kindum færra í krónna en við héldum, en það er kannski ekki alveg að marka fyrr en búið er að rýja. Ég gaf í morgun- þetta er allt annað líf að hafa svona fóðurgang, líka krakkanna vegna því núna getur Kolbrún rölt í rólegheitum eftir ganginum og kíkt í gegnum "grindverkið" til að skoða kindurnar. Núna finnst manni bara aaaalveg GLATAÐ að gefa í gömlu húsunum- iss maður er allt of fljótur að venjast þægindunum!

Annað í fréttum er að Ragnar fór aftur til tannlæknis í gær, núna fór hann á Blönduós. Ég held að það sé kannski bara best að segja ekkert meira um þá ferð...allavega kom hann heim með allar sínar skemmdir ósnertar. Ég er búin að pakka niður XBox tölvunni, hún verður ekki tekin upp aftur fyrr en búið verður að gera við allar skemmdir í tönnunum. Ragnar segist bara ekkert geta við þessu gert, hann ráði ekkert við það hvað hann er óþekkur?!! Líklega best að tjá sig ekkert um þetta mál meira, gæti sagt eitthvað sem ég sé eftir.
Hann fór líka í langþráða klippingu- það hefur ekki verið neitt sældarlíf heldur að fara með hann á hárgreiðslustofu, en það hafðist þó. Ég held að það hafi reddast af því að hann var ennþá dröggeraður síðan hann var hjá tannsa...

Það er orðið svo fljúgandi hált hérna fyrir utan að það er varla hægt að stíga niður fæti á nokkurn stað. Ég rann alla leiðina niður í fjárhús í morgun, ég var með Kolbrúnu í fanginu og ég get svo svarið það að ég nötraði og skalf þegar ég komst loksins á fast, ég rembdist svo mikið við að standa í lappirnar! Ég vona bara að allur snjórinn fari og komi ekkert aftur, það mega sko vera rauð jól mín vegna!

Fjárhús, fjárhús, fjárhús...

2005-12-02T10:30:00.000Z

Já, það er komin pínku ponsu mynd á þetta, en það er líka svaaaaakalega mikið eftir! Ég var búin að hreinsa svo vel til inni, tína alla spýtukubba og plast sem lá út um allt- núna er þetta orðið þúsund sinnum verra en þetta var nokkurn tímann! Varla hægt að stíga niður fæti nokkurs staðar, við þurfum að vera ansi rösk ef við ætlum að taka inn á sunnudaginn c",) Sé reyndar ekki að það verði, það á eftir að græja allt vatn og rafmagn- ég held að það sé ekkert gaman að bera vatnið úr gömlu húsunum sko...

Það er komið vel á veg með að setja stóru hurðina sunnan á hlöðuna, við fengum Baldur í Saurbæ til að hjálpa okkur. Alveg vonlaust að fá nokkurn í þetta, annað hvort brjálað að gera hjá viðkomandi eða þá að það kann enginn að setja svona hurð í. Ég verð alveg svakalega fegin þegar þessi hurð verður komin í því við höfum ekki komist með vél inn í hlöðuna í marga mánuði og draslið inni í henni er eftir því! Líka alveg glatað að koma rúllunum ekkert lengra en rétt inn fyrir hlöðugatið og þurfa svo þá að rúlla þeim út um alla hlöðuna til að koma þeim á áfangastað. Reyndar hefur ekkert verið hægt að rúlla þeim neitt að ráði- það er svo mikið drasl út um allt að það hefur ekki verið hægt með góðu móti! Ég bara skil ekki í öllu þessu drasli hérna, þetta sprettur af sjálfu sér þetta helvíti..

Nonni keypti sér nýjann jeppa um daginn, Nissan Patrol árg. 95 held ég að hann sé. Bara voðalega fínn að sjá og hann fékk hann á góðu verði held ég. Náttúrulega varð ég alveg kolvitlaus af því að hann fékk sér annan bíl- ÉG VIL LÍKA FÁ ANNAN BÍL!!! En það þýðir víst lítið að hugsa um það þetta árið, fjárhagurinn verður líklegast ekki svo beysinn eftir byggingarframkvæmdirnar. Ég VERÐ bara að fara að muna að kaupa Lottó, eða kannski selja úr mér annað nýrað?

Sumir dagar....

2005-11-30T09:40:00.000Z

Ég var þess heiðurs aðnjótandi að fá að fara með Ragnar Loga til tannlæknis í fyrsta skipti á mánudaginn var (já, já ég veit að hann ætti löngu að vera farinn!).
Hann var búinn að vera að reka á eftir mér ALLAN daginn; "Mamma...förum við ekki að fara til tannlæknis...Hvenær förum við mamma..." ég var voðalega ánægð með hvað hann var áhugasamur um þetta allt saman.
Í fyrsta lagi tók það um hálftíma að koma honum inn á tannlæknastofuna. Endaði með því að ég mátti draga hann inn. Þegar inn var komið mátti ég þrögla við hann fram og tilbaka um ágæti þessa blessaða tannlæknis. Og það eina sem tannlæknirinn gat sagt var: "Tjaaaa....fyrst að þú hefur ekki betri stjórn á barninu....." Greyið klínikdaman reyndi þó- annað en BLESSAÐI tannlæknirinn. Það fór þó þannig að við komum honum í stólinn og tannlæknirinn náði að deyfa tönnina að hluta til...en svo var gamanið búið. Ragnar stökk upp úr stólnum og það var ekki viðlit að koma honum í hann aftur. Og tannlæknirinn sagði bara: "Tjaaaa...fyrst að barnið hlýðir ekki betur en þetta....". Mér langaði mest til að hlamma mér niður á gólfið og fara að grenja. Það var þó lán í óláni að Kolbrún greyið var nokkuð stillt meðan á þessu stóð, annars hefði ég farið í sjúkrabörum yfir í hinn enda hússins.
Þannig að þetta endaði með að við fórum skömmustuleg út frá tannsa með enga viðgerð, Ragnar Logi fékk engin verðlaun en ég fékk vafalaust góða ræðu um uppeldi mitt eftir að ég var farin af stofunni.
Stefnan er að reyna að fara með Ragnar til tannsa á Blönduósi, við höfum heyrt að hann sé öllu betri í samningaviðræðum við óþekk börn. Og Garðar fær að fara með hann!!

Jólin fara að koma...

2005-11-27T21:39:00.000Z

Já, það er búið að kveikja á hluta af jólaljósunum hér á bæ. Slönguserían á íbúðarhúsinu var endurnýjuð, það kom í ljós að hún hreinlega bara brotnaði í sundur þegar var farið að eiga við hana þannig að ekki þýddi annað en að setja bara nýja. Garðar fékk það hlutverk í þetta skiptið að príla upp í stigann, svo sem komin tími á að hann fái að finna hvað þetta er asskoti erfitt! Þetta gekk nú ekki áfallalaust fyrir sig, við vorum hálfnuð með að hengja á húsið þegar einn meterinn á slöngunni gaf upp öndina og við máttum byrja upp á nýtt eiginlega, rífa niður slönguna og skeyta saman. Mikið óskaplega eru þessi tengi leiðinleg, við eyðilögðum öruggulega þrjú tengi áður en okkur tókst að koma þessu saman, reyndar hangir hún bara saman á heppninni núna held ég- því við urðum að púsla saman hinu og þessu til að geta tengt þetta. Núna er þá bara hlaðan eftir, ég verð að fara að redda mér meiri slöngu, þar sem að allir 50 metrarnir mínir enduðu á íbúðarhúsinu c",)

Við fengum "skemmtilega" heimsókn á laugardagskvöldið; enginn annar en Herbert Guðmundsson var mættur til að reyna að selja okkur bækur. Og....já ég er engu skárri en mamma var í den, auðvitað gat ég ekki annað en keypt af kallinum, enda fengum við áritaðan disk frá honum með bestu lögunum hans í kaupbæti. Hvenær bækurnar verða lesnar veit ég ekki- Garðari leist meira að segja vel á þær og hann er nú ekki mikill bókamaður! Ég skal láta ykkur vita hvernig bækurnar eru þegar hann er búinn að renna í gegnum bindin þrjú...

Annars er ein mesta lesning þessa heimilis komin út; Hrútablaðið skilaði sér í vikunni og núna er mikið spáð og spekúlerað í hrútum. Annars er Garðar ósköp lítið spenntur fyrir sæðingunum núna, sér ekki fram á að það verði nokkur tími í svona dúllerí. Ætli það endi ekki með að það verða bara engir hrútar settir í þetta árið, það er hvort eð er enginn tími til að taka á móti lömbunum c",)
Okkur líst nú vel á Bergstaðahrútana, spennandi að fá þá inn á stöðina og vonandi eiga þeir eftir að koma vel út, alveg frábærir einstaklingar greinilega.

Ég er ekki ennþá búin með rollubókhaldið, ég bara nenni EKKI að vesenast í þessu þegar ég hef ekki algjöran frið. Kolbrún hamast á lyklaborðinu um leið og hún kemst í það, ýmislegt er búið að hverfa úr tölvunni hjá mér upp á síðkastið- guð má vita hvar það er niðurkomið. Svo sefur hún svo stutt á daginn að ég er rétt búin að brynna, hengja út á snúruna og taka úr uppþvottavélinni þegar hún er vöknuð aftur. Óþolandi stutt gleði semsagt.

Ég verð svo að fara að skella inn nýrri mynd af fjárhúsunum, fyrsti garði er að verða klár sem og fóðurgangurinn, allavega er komin mynd á þetta innanhúss. Bjössi greyið tók sér frí um helgina, hann var orðinn alveg útbrunninn karlgreyið. Enda er hann búinn að vinna frá morgni til kvölds síðan í byrjun nóvember.

Jæja, hætt þessu bulli í bili...

Eitthvað sem ALLIR verða að vita.

2005-11-25T19:16:00.000Z

Draugadrjóli: Þú finnur hann koma út en það er enginn kúkur í klóinu þegar þú kíkir.

Hreinn skítur: Sá sem þú skítur og sérð í skálinni en það er ekkert á skeinipappírnum.

Eltikúkur: Þegar þú ert búinn að kúka og búinn að girða hálfa leið upp þegar þú fattar að þú þarft að kúka meira.

Sprengja-æð-í-enninu hnulli: Sá sem þú þarft að hafa svo mikið fyrir að koma frá þér að þú færð næstum slag.

Dauðadrumbur: Svo ógeðslega stór að þú þorir ekki að sturta án þess að búta hann sundur með blýanti.

Loftpressukúkur: Kemur með svo miklum látum að allir í kallfæri flissa.

Þynnkuskita: Kemur eftir fyllerí. Helsta einkenni hans eru bremsuförin í skálinni.

Maískúkur: Skýrir sig sjálfur.

Ohh-ég-vildi-að-ég-gæti-kúkað kúkur: Þú þarft að kúka en situr bara á dollunni og fretar.

Mænustunguskítur: Þessi er svo brjálæðislega sársaukafullur að þú ert viss um að hann sé á leiðinni út þversum.

Rasskinnableytuþrumari (Orkuþrumari): Fer út á svo miklum hraða að afturendinn á þér rennbleytist af klósettvatni.

Fljótandi drulla: Gulbrúnn vökvi frussast út um alla skál og rassgatið á þér með.

Háklassa kúkur: Kúkur sem lyktar ekki.

Óvæntur kúkur: Þú ert ekki einu sinni á klóinu því þú hélst að þú þyrftir bara að prumpa en... úps, sparð.

Slórskítur: Kúkurinn losnar ekki frá rassgatinu á þér þó þú sért búinn að kúka fyrr en þú hristir þig vel.

Atómsprengja: Þig svíður undan þessum á leiðinni út og svíður enn í marga klukkutíma á eftir.

Skopparakúkur: Hörð spörð sem fara eins og skopparaboltar um alla skálina (kostur: þarf lítið að skeina).

Long John Silver: Svo langur að þú þarft að kúka- klippa- kúka- klippa...

Það var einhver sem sendi mér þetta, hefur líklegast talið að ég hefði góða þörf fyrir að vita allt um þessi fræði. Leyfi ykkur að njóta með mér...

Djö.... veður!

2005-11-23T18:11:00.000Z

Ég er að verða búin að fá mig fullsadda af þessu veðri hérna, það er hávaðarok og éljagangur upp á hvern einasta dag :o(
Ég var að baslast við að setja seríu á sólpallinn í dag, og svei mér þá ef ég mun ekki missa einhverja fingur og tær eftir það helvíti, kuldinn var svo mikill. Ég ætlaði svo að kveikja á seríunni sem er á útihúsunum en þá virkaði bara slönguljósið sem er á mjólkurhúsinu. Ekki hinir skrilljón metrarnir sem kostaðu mig MIKLA vinnu við að koma upp. Og húsið er steindautt líka, mér finnst nú endingin á þessum slönguljósum ekki vera sérlega góð, satt best að segja. Garðar sagði að við ættum bara að hætta þessu ljósaveseni- huh......fyrr frýs í helvíti en að ég hætti! Ég verð bara að komast í verslunarleiðangur sem fyrst ;o)

Fjárhúsin potast áfram, það er að verða búið að einangra og Bjössi smiður er byrjaður á að smíða fóðurganginn. Líklega getum við tekið inn fljótlega eftir helgina, svona ef ekkert óvænt kemur upp á. Þetta lítur bara vel út finnst mér, auðvitað verður margt sem næst ekki að fullganga frá strax, en það verður bara að hafa það. Við verðum bara að dunda okkur við það svona smátt og smátt. Þetta reddast allt saman....

Taddarata!!

2005-11-19T18:47:00.000Z

Það er sko heldur betur búið að vera líf í tuskunum þessa dagana. Það liggur orðið við að það sé smíðað hér allan sólarhringinn, hamarshöggin dynja líka orðið í kollinum á manni þegar maður sefur!
Við fengum alveg heilmikinn liðsauka í dag, 9 fílefldir karlmenn mættu á svæðið (+ Garðar, Garðar og Bjössi) og hjálpuðu okkur að koma járninu á hliðarnar og einangra. Alveg ótrúlegt hvað náðist að gera mikið í dag. Við fengum líka ómetanlega hjálp um daginn við að koma þakinu á sinn stað, ég segi nú bara þúsund þakkir til ykkar allra - þetta hefði verið margra daga verk ef ykkar hefði ekki notið við! Líklegast getum við bara byrjað eftir helgina að græja inni í húsunum- svei mér þá, maður fer að sjá fyrir endann á þessu!

Bara einn datt af húsþakinu, auðvitað gat þetta ekki gengið alveg áfallalaust fyrir sig. Nonni greyið renndi sér niður af þakinu, greip í eitt rennujárnið á leiðinni niður og reif á sér hendina vel og vandlega. Það þurfti að sauma 9 spor í hendina, það passaði auðvitað að þegar doksinn var að sauma hann, að þá var hann kallaður út og Nonni mátti bíða eftir hinum átta sporunum í einhvern klukkutíma. Við sendum hann auðvitað ekki upp á þak aftur, en hann fékk að troða ullinni í veggina í staðinn ;o)

Þriðji í smíðum...

2005-11-12T17:39:00.000Z

Ég held áfram að setja inn mynd af fjárhúsunum, svo þið getið séð muninn frá degi til dags, mikið verð ég fegin þegar þetta verður allt búið! Þá er bara næst að skella sér í viðbygginguna við íbúðarhúsið, ekki veitir af ef að Garðar ætlar sér að eiga MINNST 4 börn. Nei, ég held að ég leggi ekki í neinar stórframkvæmdir á næstunni, hleð frekar bara börnunum ofan á hvort annað ;o) Verst að öll efri hæðin er undir súð þannig að ekki gengur að hafa kojur þar.

Ég er alveg friðlaus í að kaupa mér annan bíl þessa dagana, langar svo mikið í Huyndai Starex. Skil ekki hvernig fólk sem á 2 börn+ nennir að hírast með hele familien í venjulegum fólksbíl. Barnabílstólarnir taka allt plássið aftur í og þá er bara skottið laust fyrir aukafarþega. Ég hef svo sem aldrei haft nokkra skipulagshæfileika, kannski spurning um að fara bara á námskeið í hagnýtri röðun og sleppa því að eyða sínum fáu krónum í einhverja stærri bíldruslu. En mér langar samt alveg rooooosalega að fara að versla mér bíl- þó að ég hafi ekkert efni á því. Ojæja-koma tímar, koma ráð....

Dagur 2.

2005-11-11T17:27:00.000Z

Það er víst best að skrifa nokkrar línur hérna, svona fyrir familíuna og vini sem fylgjast með því sem við erum að gera þessa dagana ;o)

Það er bara búinn að vera rífandi gangur í byggingunni í dag, búið að setja límtrésbitana upp með krana og alles. Annars hef ég ekki hunds- né hænuvit á þessu, þetta lítur bara alveg voðalega vel út allt saman og þá er ég barasta kát! Garðar (frændi Garðars..) og Hanni fara á sunnudaginn, en svo kemur Garðar aftur um miðja vikuna. Bjössi smiður verður hér áfram, ekki veitir víst af, ætli hann verði hérna ekki bara yfir jólin kallinn ;o) Það er bara vonandi að grunnurinn fari ekki að fyllast af snjó áður en verður búið að koma járninu á, en það væri nú svo sem eftir okkar heppni...

Jahhhh...ég fór eftir hádegið og reyndi að temja beljurnar mínar, hafði ekki árangur sem erfiði. Ég talaði voðalega blítt til þeirra og reyndi að strjúka þeim, en fékk bara hvæs og hnoð í staðinn. Svo reyna þær að slá mann líka helvískar þegar maður mokar undan þeim -ekki var það nú til að bæta þetta. Og bæ þe vei.....þær eru ekki farnar að éta ennþá, svona ef einhver vill vita það! (sem að mér finnst reyndar mjööög ólíklegt)

Mér tókst að missa myndavélina mína í gólfið í gær, þannig að núna er flassið dautt. Fór í dag og lét skipta um batteríið en það skipti engu- hún tekur ekki eina einustu mynd með flassi. Þannig að ég verð að taka bara myndir í góðri dagsbirtu ef þær eiga að vera nothæfar. Ég var að vonast til að ég hefði stillt hana eitthvað vitlaust en leiðbeiningarnar sem fylgja með eru á þýsku, frönsku og ítölsku -ekki snefill á ensku takk. Ég verð bara að bíða eftir að einhver komi í heimsókn sem kann þessi tungumál, því ekki kann ég þau, svo mikið er víst. Samt á ég að vera stúdent í þýsku og held meira að segja að ég hafi fengið 9 í öllum áföngunum - en ég get ekki sagt eina einustu nothæfu setningu á þessu blessaða tungumáli. Já það er gott að vera búinn að læra svona mikið í skóla....

Loksins!!

2005-11-10T17:17:00.000Z

Jæja! Ég var búin að skrifa alveg heljarinnar runu hérna, en svo bara datt allt út! Djö..... getur þetta verið pirrandi :o(

Loksins er farin að koma smá mynd á fjárhúsin nýju. Enda ekki seinna vænna þar sem veturinn er sko LÖNGU kominn hérna! Ég verð að segja að ég var orðin pínu desperat yfir þessu öllu, þar sem að rúmlega 200 kindur bíða úti eftir nýja húsinu. En ætli þetta sleppi ekki til, sæmileg spá á næstunni og byrjað verður að setja járnið á í næstu viku. Þetta reddast ;o)

Það bættist við bústofninn í vikunni, ÉG (já, takið eftir; ÉG) keypti tvær holdakýr, og svei mér þá þær eru alveg kolvitlausar! Tók okkur tvo daga að koma þeim á bás í hesthúsinu, ætli það taki ekki tvo daga að koma þeim út aftur. Annars er ég ekkert bjartsýn á það að koma þeim út aftur, þær eru alveg snarvitlausar ennþá, samt búnar að vera inni í þrjá daga. Og þær éta eiginlega ekki neitt, öll þeirra orka fer í að blóta okkur...
Garðar er alveg miður sín yfir þessu, hann hélt ekki að þær yrðu svona klikkaðar. Enda er hann duglegur að minna mig á það hver sé eigandinn að þessum kvikindum! Iss, hann á eftir að dauðöfunda mig þegar ég fer að leggja inn 350 kílóa tuddana mína ;o) Ég reyndi að ná myndum af þeim en það var hægara sagt en gert, þær voru svo brjálaðar að ekki sást orðið á milli bása í hesthúsinu vegna móðu!
Kattarskömmin á bænum gaut sex kettlingum í seinustu viku. Það tók hana ekki nema tvo daga að drepa þá alla, það verður að segjast eins og er að móðurástin var ekki neitt til að hrópa húrra fyrir. Ojæja, við þurfum allavega ekki að sjá um að lóga þeim, en hún hefði nú mátt halda lífinu í svona eins og einum kettlingi. Ragnar Logi var voðalega dapur yfir þessu og vill núna alveg endilega fá nýja kettlinga. Nei takk, allavega ekki fyrr en við verðum búin að koma læðudruslunni fyrir kattarnef...

Kolbrún varð eins árs á sunnudaginn, við héldum nú ekkert upp á það þannig séð, við vorum að vesenast í hrossunum; fara með folöld í sláturhúsið og svona. Fóru 8 í sláturhúsið en það eru ennþá 7 eftir heima, af því eigum við sjálf bara tvö. Alveg nóg finnst mér, maður hefur orðið engan tíma í að sinna þessu. Við þyrftum að fá okkur einn svertingja til að temja fyrir okkur í vetur, þetta gengur bara ekki svona!

Jæja læt þetta duga, má ekki byrja bloggið of skarpt, þá gæti ég guggnað á þessu einu sinni enn.. ;o)

Jahérna hér...það er sko gangur í þessu!

2005-07-27T23:45:00.000Z

Ég er nú ekki sú sperrtasta í blogginu verð ég að segja, svei mér þá ef ég sökka ekki bigtime í þessu bloggdótaríi. Ég er búin að vera að rembast við að gera heimasíðu...btw gengur það ekki ýkja vel, svo mikið moj og vesen að pósta inn nokkrum línum...hugsa að það endi bara með því að ég klári síðuna og hafi svo bara link inn á þetta blogg fyrir fréttirnar. Setji bara upp síðuna þannig að það séu bara einhverjar x upplýsingar þar og myndir, td. sér rollusíða og sér síða fyrir hrossin með tilheyrandi myndum og gúdderíi....og svo láti ég það bara sem mest vera! Í hvert skipti sem ég hef ætlað mér að laga til og gera fínt á síðunni hefur allt hreinlega fokið út í buskann hjá mér, ég hef ekki þolinmæði í svona bull. Og blessaðar myndirnar á síðunni...færast til eins og þær fái borgað fyrir það, lenda alltaf ofan í textanum hjá mér eða einhversstaðar uppi í horni á síðunni.
Ég verð að fara að taka mig á...

Hmmm....verður maður ekki að prófa..

2005-01-22T20:23:00.000Z

Blahblahblaaaa......... bara að tjekka hvernig virkar..